सुदूरपश्चिम प्रदेशमा भीषण वर्षा भइरहेको छ । वर्षाका कारण अछाममा पहिरो गएको छ भने कैलाली र कन्चनपुरमा बाढीका कारण ९०० बढी घर डुबानमा परेका छन् । सुदूरपश्चिममा शुक्रवारबाट शुरु भएको वर्षा शनिवार पनि जारी छ । लगातारको वर्षाका कारण जनजीवन प्रभावित भएको छ । 

अछामका विभिन्न भागमा पहिरो जाँदा ९ जनाको मृत्यु भएको छ । अन्य ९ जना बेपत्ता भएका छन् । लगातारको वर्षा र पहिरोमा परी जनधनको क्षति भएको छ ।

जिल्ला प्रशासन कार्यालयका अनुसार शुक्रवार रातिदेखिको वर्षासँगै पहिरो जाँदा तुर्माखाँद गाउँपालिकामा २ घर पुरिएर ९ जना बेपत्ता भएकोमा २ जनाको शव भेटिएको र बाँकीको खोजी भइरहेको निमित्त प्रमुख जिल्ला अधिकारी दिपेश रिजालले जानकारी दिए ।

बर्सातका कारण सञ्चार सेवा समेत अवरुद्ध भएको छ ।

अछामको कमलबजार, ढकारी नगरपालिका लगायतमा पहिरो गएर घर पुरिँदा उनीहरूको मृत्यु भएको हो । ठाँटीखाँदका सातै जना घर माथिबाट खसेको पहिरोमा पुरिएकामा सबैको शव फेला पारिएको छ ।

पहिरोमा परी अन्य ८ जना घाइते भएकोमा ४ जनाको अवस्था जटिल छ ।

पहिरोकै कारण ढकारी गाउँपालिकामा १ घर पुरिँदा ३ जना घाइते भएका छन् । अछामका विभिन्न स्थानमा पहिरोका कारण क्षति भएपछि स्थानीय प्रशासन, प्रहरी टोली बिहानैदेखि उद्धारमा खटिएको छ ।

जिल्ला प्रहरी कार्यालयका प्रहरी नायब उपरीक्षक नारायण डाङीले अछामका अन्य ठाउँमा पनि पहिरोले घर पुरिएर क्षति भएको खबर आएकाले प्रहरीको टोली परिचालन गरिएको जानकारी दिए ।

कैलाली र कन्चनपुरमा बाढीको वितण्डा

शुक्रवारदेखि परिरहेको अविरल वर्षाले कैलाली र कन्चनपुरमा वितण्डा मच्चाएको छ । बाढीका कारण पूर्वी कैलालीमा झण्डै ६०० घर डुबानमा परेका छन् । कन्चनपुरमा पनि ३० बढी घर डुबानमा परेको छ । 
कैलालीको कान्द्रा र पथरिया नदीको बाढी बस्तीमा पस्दा पाँच सय बढी घर डुबानमा परेका छन् । जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) वेदप्रकाश जोशीले भजनी नगरपालिका–८ मारहेको पथरिया नदीको पानी बस्तीमा पस्दा करिब १६० घरधुरी डुबानमा परेको जानकारी दिएका छन् । सोनाफाँटा टोल, दैलेखी टोल, भरतान टोल, जनकपुर टोल र छछरहवा टोलकाघरहरू डुबानमा परेको उनले जानकारी दिए । 

यस्तै कान्द्रा नदीमा पानीको सतह बढेर बस्तीमा पसेपछि मिलनपुर टोल, लालबोझी र पुलियापुर टोलका २५० घर डुबानमा परेका छन् भने कान्द्रा नदीकै बाढीले भजनीनगरपालिका–७ को शिविर टोल, गणेशमान टोल र दक्षिणपूर्वा टोलका पनि करिब २५० घर डुबानमा परेका छन् ।

बाढी प्रभावितहरूको उद्दारको कार्य भइरहेको प्रहरीले जनाएको छ । 

उता कञ्चनपुरका विभिन्न नदी किनारका बस्तीमा बाढी पसेको छ । शुक्रवारदेखि भइरहेको अविरल वर्षासँगै आएको बाढीले नदी किनारका वासिन्दा विस्थापित भएका छन् ।

शुक्लाफाँटा नगरपालिकाको वनहरा शिविरका ३० घरका १२० जना विस्थापित भएका छन् । भूमिहीन, सुकुम्वासीहरू शिविरमा बस्दै आएका छन् । बस्तीमा बाढी पसेपछि रातिदेखि नै शुक्लाफाँटा नगरपालिकाका प्रमुख रणबहादुर महरा, उपप्रमुख कल्पना पन्त, सशस्त्र प्रहरी र स्थानीयले उद्धारको काम गरिरहेका छन् ।

यस्तै, कृष्णपुर नगरपालिका–१ दोमिल्ला, पुतलीबजार, श्रीपुर, २ नम्बर वडाको वनहरा, वाणी शिविर, ५ नम्बर वडाको बबित्रा बस्ती, गुलरिया बजार, ८ नम्बर वडाको मझगाउँ लगायत ठाउँ जलमग्न र डुबानमा परेका नगर प्रमुख हेमराज ओझाले जानकारी दिए ।

प्रमुख ओझाले संयमित भई उद्धार र सहयोगमा जुट्न सबैमा अपिल गरेका छन् ।

बाढीपहिरो प्रभावितको हेलिकप्टरबाट उद्धार गर्न गृहमन्त्री खाँणको निर्देशन

गृहमन्त्री बालकृष्ण खाँणले लगातारको वर्षापछि अछामका विभिन्न स्थानमा आएको बाढी र पहिरोमा परी घाइते भएकाहरू, प्रभावितको उद्धारका लागि तत्काल हेलिकप्टर पठाउन गृह प्रशासनलाई निर्देशन दिएका छन् ।
गृहसचिव टेकनारायण पाण्डे, सुरक्षा तथा समन्वय महाशाखा प्रमुख फणिन्द्रमणि पोखरेल र विपद् तथा द्वन्द्व व्यवस्थापन महाशाखा प्रमुख प्रदीप कोइरालालाई घाइते तथा प्रभावितको उद्धारका लागि तत्काल हेलिकप्टरको व्यवस्था गर्न निर्देशन दिएका हुन् ।

अछामका प्रमुख जिल्ला अधिकारी विश्वराज मरासिनी र जिल्ला प्रहरी प्रमुख प्रहरी नायब उपरीक्षक नारायण डाँगीलाई टेलिफोन गरेर घटनाबारे जानकारी लिएका छन् । उनले प्रजिअ मरासिनी र नायब उपरीक्षक डाँगीलाई सरकारको प्रमुख दायित्व नागरिकको जिउँधनको रक्षा गर्नु भएको भन्दै बाढी र पहिरोमा परी घाइते भएको उद्धार, प्रभावितलाई सुरक्षित स्थानमा सार्न र औषधि उपचार तथा खाद्यान्नको व्यवस्था गर्न कुनै कसूर बाँकी नराख्न र जिल्लामा भएको स्रोतसाधनले अपुग भएमा मन्त्रालयमा तत्काल लेखी पठाउन निर्देशन दिएका छन् ।