धानमा विभिन्न किसिमको रोग देखिएपछि चितवनका किसान चिन्तित बनेका छन् ।

किसानको दिनचर्या अहिले धानको नमूना लिएर कृषि ज्ञान केन्द्र तथा पालिकामा रहेका कृषि शाखामा जाने र समस्या सुनाउने बनेको छ ।
 
भरतपुर महानगरपालिका–२१ पार्वतीपुरकी रोसनी ढकाल ओआर धानमा लागेको रोगको बारेमा जानकारी लिन बिहीवार ज्ञान केन्द्रमा नमूना लिएर आइपुगेका थिए । समयमा युरिया र पोटास मलको कमी भएका कारण उनको धानमा पहेंले रोग लागेको देखियो ।

उनले भने, ‘औषधि गर्दागर्दै धान मर्ने हो कि भन्ने चिन्ता छ ?’ 

समयमा मल नपाउँदा धानमा समस्या देखिएको भन्दै ढकालले भने, ‘धान लगाउँदा २० हजार खर्च आयो । अब रोगले गर्दा लगानी बराबरको धान उत्पादन हुन्छ कि हुँदैन भन्नेमा शंका छ ।’

उनी र आसपासका खेतमा करीब ५ बिघा क्षेत्रफलको धानमा यो समस्या देखिएको उनले बताए ।

भरतपुर महानगरपालिका–१४ शिवनगरका किसान दिलबहादुर थापाले १ बिघामा लगाएको धान १ रातमा किराले सखाप पारेको बताए । बिहीवार बिहान उठ्दा धान किराले काटिसकेको उनले गुनासो गरे ।

धान पसाउने समयमा विभिन्न किराका कारण समस्या देखिएको भन्दै उनले भने, ‘समस्या समाधान हुनु पर्‍यो । नत्र हामी किसान मर्कामा पर्छौं ।’
 
किसानको बारीमा अहिलेको धानमा शित व्लाइट (पातको फेद डडुवा), नेक व्लाष्ट (घाँटी मरुवा), ह्वाइट फ्लाइ (सेतो झिँगा), युरिया र पोटासको कमीका कारण पहेंलो हुने समस्या र धानमा दाना नलाग्ने समस्या देखिएको कृषि ज्ञान केन्द्रले जनाएको छ ।

ज्ञान केन्द्रकी अधिकृत सुरुची त्रिपाठीका अनुसार अहिले ज्ञान केन्द्रमा दैनिक १० हाराहारी किसान समस्या लिएर आउने गरेका छन् । उनका अनुसार जिल्लाका सातै पालिकामा यो समस्या देखिएको छ ।