युक्रेनको डोनेत्स्क, लुगान्स्क, खर्सन र जापोरिजा क्षेत्रमा शुक्रवारबाट जनमतसंग्रह शुरू भएको छ । 

आगामी मंगलवारसम्म मतदान जारी रहनेछ । बुधवार प्रारम्भिक परिणाम आउने अपेक्षा छ । 

डोनेत्स्क र लुगान्स्क सन् २०१४ मा युक्रेनबाट छुट्टिएर स्वघोषित जनगणतन्त्र बनेका थिए । त्यहाँ अधिकांश रुसीभाषीहरू बस्छन् र त्यो ठाउँ रुससँगको सीमामा पर्छ । मस्कोले गत फेब्रुअरीमा तिनलाई स्वतन्त्र राष्ट्र घोषणा गरेको थियो । 

रुसले अहिले युक्रेनको दक्षिणी भागमा रहेको खर्सन र जापोरिजालाई नियन्त्रणमा लिएको छ । गत फेब्रुअरी २४ मा रुसले युक्रेनविरुद्ध विशेष सैन्य कारवाही चलाएपछि ती भूभाग नियन्त्रणमा लिएको हो । 

युक्रेन सरकारले जनमतसंग्रह अवैध भएको र त्यसलाई मान्यता नदिने बताएको छ । युरोपेली संघले जनमतसंग्रहलाई झूटो भनेको छ ।