अन्ततः नेपालमा ‘प्रेमगीत ३’को हिन्दी संस्करण भोलि (सोमवार)देखि प्रदर्शनमा  आउने भएको छ । 

चलचित्र विकास बोर्डले ‘प्रेमगीत ३’को हिन्दी संस्करण सेन्सरका लागि सञ्चार तथा सूचना प्रविधि मन्त्रालय केन्द्रीय चलचित्र जाँच समितिलाई सिफारिस गरेको छ । 

सञ्चार मन्त्रालयको निर्देशन र कर चुक्ता लगायतको प्रक्रिया चलचित्रले पूरा गरेपछि विकास बोर्डले आईतबार सेन्सर सिफारिस गरेको हो । 

विकास वोर्डले सेन्सर सिफारिस गरेसँगै चलचित्र सेन्सर भएर घटस्थापनाको दिनदेखि प्रदर्शनमा आउने भएको हो । चलचित्रका निर्माताले सेन्सर सिफारिसको पत्र बुझेका छन् ।

चलचित्रको सेन्सर आइतवार बेलुका हुने निर्माण टिमले जनाएको छ । यो सँगै अब, ‘प्रेमगीत ३’को हिन्दी संस्करण नेपाली चलचित्र सरह प्रदर्शनमा आउने भएको छ । 

चलचित्रले १५ प्रतिशत विकास शुल्क पनि तिर्नुपर्ने छैन । 

‘प्रेम गीत ३’को हिन्दी संस्करणको बुकिङ आइतबार साँझदेखि नै खुलाउने तयारी गरिएको छ ।

सञ्चार मन्त्रालयले हिन्दी ‘प्रेमगीत ३’ पनि नेपाली चलचित्र भएको घोषणा गरेसँगै नेपालीसरह प्रदर्शन हुन लागेको हो ।

शुक्रवारदेखि प्रदर्शनमा आएको ‘प्रेमगीत ३’ले उत्साहजनक व्यापार गरिरहेको छ । 

छेतेन गुरुङ र सन्तोष सेनको निर्देशन रहेको चलचित्रमा प्रदीप खड्का र क्रिष्टिना गुरुङ मुख्य भूमिकामा छन् ।