चलचित्र विकास बोर्डले शुक्रवारदेखि ‘वल्र्डवाइड’ प्रदर्शनमा आएको चलचित्र ‘प्रेमगीत ३’को हिन्दी डबको विषयलाई लिएर भएको विवादको विषयमा आफ्नो धारणा सार्वजनिक गरेको छ । आइतवार प्रेस विज्ञप्ति जारी गर्दै ‘प्रेमगीत ३’को हिन्दी डबको सम्बन्धमा भए गरेका काम कारबाही र प्रक्रियाको विषयमा बोर्डले स्पष्ट पारेको हो । 

बोर्ड अध्यक्ष भुवन केसीद्वारा जारी विज्ञप्तिमा चलचित्रको हिन्दी डबलाई लिएर विकास बोर्ड र बोर्डका पदाधिकारीविरुद्ध लान्छनायुक्त अभिव्यक्ति, टिका–टिप्पणी एवं व्यक्तिगत गाली गलौजसमेत गरी भ्रामक, कपोकल्पित समाचारहरू आएको भन्दै त्यसमा गम्भीर ध्यानाकर्षण भएको जनाइएको छ । ६ बुँदामा जारी गरिएको विज्ञप्तिमा ‘प्रेमगीत ३’को हिन्दी स्वरांकनको स्कीकृतिका लागि कर चुक्ता प्रमाणपत्र पेश नगरी दरखास्त दिएकाले सिफारिस नगरिएको उल्लेख छ । 

कर चुक्ता प्रमाणपत्र पेश हुनासाथ सोही मितिमै पुनः स्वरांकनको स्वीकृति दिइएको बोर्डले जनाएको छ । ‘असोज ७ मा करचुक्ता प्रमाणपत्र पेश हुनासाथ सोही मितिमै पुनः स्वरांकनको स्वीकृति दिई असोज ९ मा सेन्सर सिफारिसका लागि निवेदन प्राप्त हुनासाथ चलचित्र जाँचका लागि सिफारिस भएको, बोर्डबाट सेवाग्राहीको कुनै पनि काममा प्रक्रियागत ढिलासुस्ती र अवरोध नभएको सम्बन्धित सरोकारवाला एवं आम जनमानसका स्पष्ट पार्न चाहान्छौँ’, विज्ञप्तिमा भनिएको छ । 

सत्य तथ्यमा आधारित रहेर समाचार सम्प्रेषण गर्नसमेत बोर्डले अनुरोध गरेको छ ।