दशैं नजिकिएसँगै काठमाडौं महानगरपालिकाले चाडपर्व लक्षित बजार अनुगमन शुरू गरेको छ ।

काठमाडौं महानगरपालिकाकी उपमेयर सुनिता डंगोलको नेतृत्वमा मंगलवारबाट चाडपर्व लक्षित बजार अनुगमन शुरू भएको हो ।

मंगलवारै महानगरपालिकाले टुकुचास्थित प्रदर्शनी मार्गमा रहेको तरकारी तथा फलफूल बजारको अनुगमन गरेको छ भने खाद्यान्न पसलमा पनि अनुगमन गरेको छ । 

उपेमयर डंगोलका अनुसार महानगरपालिकाले मंगलवारै भाटभटेनी सुपर मार्केटमा पनि अनुगमन गरेको छ । उपप्रमुख डंगोलको नेतृत्वमा मंगलवार ३ वटा समूह बजार अनुगमनका लागि परिचालित भएका छन् ।

‘कुनै पनि पसलमा सामान किन्न जाँदा उपभोक्ताले ठगिएको महसूस गरेको अवस्थामा वा अखाद्य वस्तु बिक्री गरिरहेको भेटिएमा हाम्रो हटलाइन ११८० र १६६००१०५५११ मा खबर गर्न पनि आग्रह गर्दछौं,’ उपमेयर डंगोलले भनिन्, ‘हामी यो अनुगमनलाई दशैंअघि र पछि पनि निरन्तरता दिन्छौं । तपाईंहरूले खबर गरेको आधारमा पनि हामी तत्काल अनुगमन टोली त्यहाँ खटाउँछौं र आवश्यक कारवाही प्रक्रिया अघि बढाउँछौं ।’ 

उनले मंगलवार टुकुचास्थित प्रदर्शनी मार्गमा रहेको तरकारी र फलफूल बजारमा अनुगमन गरेको जानकारी दिइन् । उनका अनुसार मंगलवारै त्यहाँ आसपासका खाद्यान्न पसलमा पनि महानगरपालिकाले अनुगमन गरेको छ ।

‘हामीले आजै भाटभटेनीमा पनि अनुगमन गरेका छौं,’ उनले भनिन्, ‘हामीले आजको अनुगमन मिति गुज्रिन लागेका र अरु सामान पनि एकै ठाउँमा राखेको भेटायौं । उहाँहरूलाई यस्ता सामान छुट्याएर राख्न आग्रह गरेका छौं । म्याद गुज्रिएका सामान भेटिएको अवस्थामा तत्कालै कारबाही गर्छाैं । हामीले अनुगमन त्यहीअनुसार गरिरहेका छौं ।’ 

उपमेयर डंगोलले अनुगमनका क्रममा केही पसलमा बिक्रीका लागि राखिएको प्याकेजिङमा उत्पादन मिति प्रस्टसँग नलेखिएको र हातले पुछ्दा सहजै मेटिने भेटिएको पनि बताइन् । ‘त्यस्तो भेटिएको ठाउँमा हामीले सजग गराउँदै प्याकेजिङमा उत्पादन मिति प्रस्टसँग लेखिएको सामान मात्रै बिक्री गर्न भनेका छौं ।’

उनले अनुगमनका क्रममा केही डिपार्टमेन्टल स्टोरले स्थानीय उत्पादनको सामान पनि राखेको भेटिएको बताइन् । ‘उहाँहरूलाई स्थानीय उत्पादन लिँदा उहाँहरूको कम्पनी दर्ता छ कि छैन ? प्यान नम्बर छ कि छैन हेरेर मात्रै लिन सुझाव दिएका छौं,’ उनले भनिन्, ‘हामीले अनुगमनका सिलसिलामा खाद्यान्न लगायतको मूल्यसूची नियमित ‘अपडेट’ गर्न सुझाव दिएका छौं । कतिपय ठाउँमा लामो सयमसम्म पनि मूल्यसूची ‘अपडेट’ गरेको देखिएन । हामीले त्यस्ता पसललाई सकेसम्म दैनिक, नभए पनि दिन बिराएर अनिवार्य ‘अपडेट’ गर्न सुझाव दिएका छौं । मुख्य गरेर चाडपर्वको समयमा बढी भीडभाड हुने र उपभोक्ता ठगिने भएकाले हामीले चाडपर्व लक्षित अनुगमन शुरू गरेका छौं ।’ 

बजार अनुगमन कार्यक्रममा संघ तथा प्रदेश कार्यालयहरू सहभागी हुनेछन् । बजार अनुगमनका क्रममा सुलभ पसल, तरकारी, माछा, मासु, दुग्ध पदार्थ, डिपार्टमेन्टल स्टोर लगायत हेरिने बताइएको छ ।