सल्यानमा जीप दुर्घटना हुँदा ८ जनाको मृत्यु भएको छ ।

बाँकेको ढकेरीबाट सल्यानको कपुरकोट गाउँपालिकाको सिनवाङतर्फ आउँदै गरेको रा१ज ५६३ नम्बरको जीप कपुरकोट गाउँपालिका–३ मुलपानीमा मंगलवार राति २ बजे दुर्घटना भएको हो । 

आठै जनाको घटनास्थलमै मृत्यु भएको सल्यानका प्रहरी नायब उपरीक्षक (डीएसपी) दामोदार केसीले जानकारी दिए । मृत्यु हुनेमा जीप चालक कपुरकोट–६ का २१ वर्षीय जीतबहादुर बोहोरा, सोही ठाउँका ४० वर्षीय टोपबहादुर वली, उनका छोरा ११ वर्षीय वसन्त वली, ३७ वर्षीय धर्म वली, ३० वर्षीय सुरेश खत्री, ७० वर्षीय खुमलाल वली, ५५ वर्षीया कुमारी वली र कपुरकोट–५ का ५३ वर्षीय ललित वली छन् ।

बाँकेको ढकेरीबाट बिहे भोज खाएर फर्कंदै गरेका जन्ती बोकेको गाडी दुर्घटनामा परेको हो । जीपमा ८ पुरुष र १ महिला सवार रहेका प्रहरीले जनाएको छ । दुर्घटना परी घाइते कपुरकोट–६ जलवाङका ३५ वर्षीय तिलक वलीको तुलसीपुरमा उपचार भइरहेको छ ।

जीप अनियन्त्रित भएर सडकबाट १५० मिटर तल खसेको प्रहरीले जनाएको छ । मृतकको शव परीक्षणका लागि सल्यान अस्पताल लगिएको छ ।

दुर्घटनाको प्रहरीले थप अनुसन्धान गरिरहेको छ ।