विवाहकै दिन बेहुला गायब भएपछि विवाह कार्यक्रम के होला ? पक्कै पनि विवाह स्थगित होला र बेहुली रुन थाल्नेछिन् भन्ने अनुमान होला तर ब्रिटेनमा बेहुला भागेपछि धुमधाम भोजभतेर कार्यक्रम भएको छ ।

ब्रिटेनको वेल्स निवासी काइली स्टीडको विवाह १५ सेप्टेम्बरका दिन तय भएको थियो । काइली र बेहुलाबीच प्रेम सम्बन्ध रहेको र राजीखुशीमै विवाहको दिन तय भएको थियो ।

बेहुलीले १६ लाख रुपैयाँजति खर्च हुने गरी विवाह समारोह राखेकी थिइन् । विवाह कार्यक्रम हुने दिन एकाएक बेहुला गायब भएको खबर आयो । तैपनि बेहुली अपराह्न ४ बजेसम्म बेहुलाको प्रतीक्षामा बसिन् र भोजभतेर हुन दिइन् । ४ बजेसम्म पनि बेहुला नआएपछि बेहुली केहीबेर निराश भइन्, रुन थालिन् तर रोएर के हुन्थ्यो ?

एकछिनपछि काइलीले आफूलाई सम्हालिन् र विवाहको खुशीयालीमा सहभागी भइन् । बेहुला विना नै काइली साथीसंगीसँग नाचिन्, भोजमा सहभागी भइन् । बेहुला नभए पनि विवाहमा हुने खर्च भइसकेको थियो ।

विवाहपछि बेहुला र बेहुली हनिमुनका लागि टर्की जाने तय भएको थियो । बेहुला गायब भएपछि हनिमुन योजना स्थगित भएको अन्तर्राष्ट्रिय सञ्चारमाध्यमले जनाएका छन् ।