नेपालीहरूको महान् पर्व विजयादशमीका लागि भारतबाट फर्किनेको नाकामा घुइँचो लागेको छ । रोजगारीका लािग भारतमा रहेका नेपाली चाडपर्वका बेला घर फर्किन थालेपछि गड्डाचौकी नाकामा भीड लागेको हो । 

एक सातायता कञ्चनपुरको गड्डाचौकी नाकाबाट १० हजारभन्दा बढी नागरिक स्वदेश फर्किएका छन् । जिल्ला प्रहरी कार्यालयको तथ्यांकअनुसार एक दिनमा मात्रै १ हजारभन्दा बढी नागरिक भारतबाट नेपाल फर्किंदै छन् । सोमवार मात्रै १ हजार २० जना स्वदेश फर्किएका छन् भने मंगलबार १ हजार १६५ जना स्वदेश फर्किएका छन् ।

जिल्ला प्रहरी कार्यालयका प्रमुख श्यामसिंह चौधरीले नाकामा भारतबाट आउने नेपालीको भीड लागेको बताए । ‘रोजगारीका लागि भारतमा रहेका नेपाली घर फर्किने क्रम बढेको छ, नाकामा भीडभाड छ’, उनले भने, ‘भीडभाड बढेपछि सीमा क्षेत्रमा सुरक्षा सतर्कता बढाएका छौँ ।’ उनले अहिले भारत जानेभन्दा नेपाल आउनेको संख्या बढी रहेको बताए । 

भारतबाट घर फर्किनेको चाप बढेपछि प्रहरीले आपराधिक गतिविधि न्यूनीकरणका लागि नाकामा तालीम प्राप्त कुकुर परिचालन गरेको छ । सुदूरपश्चिम प्रदेश प्रहरी कार्यालय धनगढीस्थित कुकुर शाखाबाट ‘लिली’ नामको कुकुरसहितको सुरक्षा टोली परिचालन गरिएको उनले बताए । 

‘चाडपर्व सुरक्षा योजनाअन्तर्गत नाकामा तालिम प्राप्त कुकुरसहितको सुरक्षा टोली परिचालन गरेका छौँ’, उनले भने, ‘भारतबाट आउने यात्रुको सुरक्षित यात्राका लागि र आपराधिक गतिविधि न्यूनीकरणका लागि नाकामा कुकुर परिचालन गरिएको हो ।’

उनले चाडपर्वका बेला हुने आपराधिक क्रियाकलाप न्यूनीकरणका लागि प्रहरीले सुरक्षा व्यवस्था कडा पारेको बताए । उनका अनुसार लिलीले नियमित रुपमा नाकामा जाँच गर्ने बताए । 

भारतको हिमाञ्चलबाट घर फर्केका लम्कीचुहाका रामबहादुर भण्डारीले दशैं मनाउनका लागि घर फर्केको बताए । ‘भारतको हिमाञ्चलमा रोजगारीका लागि गएको १० वर्षभन्दा बढी भइसक्यो, हरेक वर्ष दसँै मनाउन घर आउँछौँ’, उनले भने, ‘दशैं तिहार मनाएर फेरि रोजगारिका लागि भारत फर्किन्छाँै, नेपालमा रोजगारी छैन ।’ भारतको दिल्ली, मुम्बई, महाराष्ट्र, पञ्जाब, बैङ्गलोर, सिमला, हिमाञ्चल, हरिद्वार लगायतका सहरमा नेपाली रोजगारीका लागि जाने गरेका छन् । 

भारतबाट आउनेमा विभिन्न रोगको संक्रमणको जोखिम रहेकाले नाकामै जाँचको व्यवस्था मिलाइएको जिल्ला स्वास्थ्य कार्यालयले जनाएको छ । भारतबाट फर्किनेहरू नाकामा कोरोना परीक्षण र खोप लगाउने डेंगु, मलेरिया जाँच भइरहेको छ । रासस