गत भदौ २९ गते ईन्द्र जात्राको दिन मादक पदार्थ सेवन गरी काठमाडौंमा विभिन्न स्थानमा जथाभावी सर्वसाधरणलाई धारिलो हतियार प्रहरी घाइते बनाएको अभियोगमा ४ जना पक्राउ परेका छन् । 

प्रहरीले काठमाडौं महानगरपालिका वडा नं. २१ जैशीदेवललगायत विभिन्न स्थानमा बसिरहेका सर्वसाधारणमाथि जथाभावी हतियार प्रहार गरेको अभियोगमा उनीहरूलाई पक्राउ गरेको हो । 

पक्राउ पर्नेमा मकवानपुर बकैया १ का २२ वर्षीय राजेश लामा, सिन्धुली तीनपाटन १ का १८ वर्षीय राजु मगर र अन्य दुई जना रहेका छन् । 

उनीहरू स्थानीय राजिव श्रेष्ठलगायत ७ जनालाई आक्रमण गरी घाइते बनाएका थिए । घाइतेहरूको राष्ट्रिय ट्रमा सेन्टरमा उपचार भइरहेको छ । 

उनीहरूविरुद्ध मुलुकी अपराध (संहिता) ऐन, २०७४ को परिच्छेद –१२ को ‘ज्यानसम्बन्धी कसूर’ मा प्रहरी बृत्त जनसेवाबाट थप अनुसन्धान भइरहेको प्रहरीले जनाएको छ ।