आगामी मंसिर ४ गते हुन लागेको प्रतिनिधिसभा र प्रदेशसभा निर्वाचनका लागि मुख्य निर्वाचन अधिकृतको कार्यालय मकवानपुरमा स्थापना भएको छ ।

हेटौंडा उपमहानगरपालिका–२ स्थित बागमती प्रदेश मुख्यमन्त्री तथा मन्त्रिपरिषद् कार्यालयनजिकै रहेको पुरानो जिल्ला विकास समितिको भवनमा मुख्य निर्वाचन अधिकृत र निर्वाचन अधिकृतको कार्यालय स्थापना भएको हो ।

शनिवार मकवानपुरका मुख्य निर्वाचन अधिृकत ऋषिराम निरौलाले बोर्ड राखेर कार्यालय स्थापना गरेका हुन् । निर्वाचन अधिृकत निरौलाले आगामी ४ गते हुन लागेको निर्वाचन सम्पन्न गर्न न्यायपालिकाले न्यायाधीश र न्याय सेवाका अधिकृतलाई खटाएको बताए । उनले न्यायपालिकाले दिएको जिम्मेवारी इमान्दारीपूर्वक निर्वाह गर्ने प्रतिबद्धता व्यक्त गरे ।

संविधानले परिकल्पना गरेअनुसार स्वतन्त्र, निष्पक्ष र भयरहित ढंगले निर्वाचन गराउने बताए । प्रमुख जिल्ला अधिकारी राजेन्द्रदेव पाण्डेले निर्वाचनमा शान्ति सुरक्षा कायम गर्न वातावरण मिलाइसकेको बताए । निर्वाचनमा आचारसंहिताको उल्लंघनका घटना हुनसक्ने भन्दै यसतर्फ सबैजना सचेत हुनुपर्ने प्रमुख जिल्ला अधिकारी पाण्डेले बताए ।

३ लाख ७३३ मतदाता रहेको मकवानपुरमा २ प्रतिनिधिसभा र ४ प्रदेशसभा निर्वाचन क्षेत्र छन् ।