मोरङको विराटनगर महानगरपालिका–८ मा रहेको जिल्ला कारागारमा कैद भुक्तान गरिरहेका दुई जना कैदी फरार भएपछि उक्त घटनाबारे छानबिन गर्न समिति गठन गरिएको छ । उक्त घटनामा ड्युटीमा रहेका प्रहरीको संलग्नताबारे अनुसन्धान गर्न समिति गठन गरिएको हो ।  

क्षयरोगको उपचारको लागि विराटनगर–७ स्थित क्षयरोग अस्पताल लगिएका दुई जना कैदीहरू फरार भएपछि प्रहरीले त्यसबारेमा छानबिन गर्न समिति गठन गरेको हो । उपचारका लागि भर्ना भएका दुईजना कैदी शनिवार बिहान अस्पतालबाटै फरार भएका थिए । 

१ नम्वर प्रदेश प्रहरी कार्यालय विराटनगरले प्रहरी वरिष्ठ उपरीक्षक जयराज सापकोटाको संयोजकत्वमा समिति गठन गरेको हो । समितिमा नेपाल प्रहरी प्रदेश कार्यालय धरान सुनसरीको प्रहरी टोलीसहित ५ जना सदस्य रहेका छन् । समितिलाई घटना सम्बन्धमा छानबिन गरी १० दिनभित्र रायसहितको प्रतिवेदन पेश गर्न निर्देशन दिइएको छ ।

मोरङ कारागारमा कैद भुक्तान गरिरहेका लागुऔषध मुद्दाका कैदी २८ वर्षीय मन्जिल गुरुङ र जबरजस्ती करणी मुद्दाका कैदी २८ वर्षीय राजकुमार हेमरन अस्पतालबाट फरार भएका थिए ।