खोटाङमा सञ्चालन हुँदै आएको सर्वाधिक राशिको अनुप स्मृति आमन्त्रित गोल्डकप फूटबलको तेस्रो संस्करण आगामी पुसमा आयोजना गरिने भएको छ ।

विक्रम संवत् २०६९ जेठ १ गते ट्रयाक्टरले ठक्कर दिँदा ज्यान गुमाएका माउन्ट एभरेस्ट बोर्डिङ स्कूलका छात्र अनुप राईको स्मृतिमा आगामी पुस १८ देखि २४ गतेसम्म गोल्डकपको तेस्रो संस्करण आयोजना गरिएको हो ।

दिक्तेलको माटीकोरे खेल मैदानमा सञ्चालन हुने गोल्डकपमा प्रथम र दोस्रो स्थान प्राप्त गर्ने टोलीले क्रमशः २ लाख १ हजार १११ र १ लाख १ हजार १११ नगदका साथमा कप, मेडल र प्रमाणपत्र प्राप्त गर्नेछन् । २ सेमिफाइनलिस्ट २ टोलीले नगद २५–२५ हजार रुपैयाँका साथमा प्रमाणपत्र प्राप्त गर्ने प्रतियोगिताको मूल आयोजक समिति संयोजक सागर जोशीले बताए ।

उत्कृष्ट गोलरक्षक, उत्कृष्ट डिफेन्स, उत्कृष्ट मिडफिल्डर, उत्कृष्ट स्ट्राइकर र उत्कृष्ट टोली प्रशिक्षकले नगद ५ हजार ५५५ सहित ट्रफी, मेडल र प्रमाणपत्र पाउने छन् । अनुशासित टोलीले नगद ५ हजार ५५५ रुपैयाँका साथमा ट्रफी र प्रमाणपत्र पाउने पत्रकार सम्मेलनमार्फत जनाइएको छ । 

मेन अफ द टुर्नामेन्ट र सर्वाधिक गोलकर्ताले नगद ७ हजार ५५५ सहित ट्रफी, मेडल र प्रमाणपत्र प्राप्त गर्ने आयोजकले जानकारी दिएको छ । आयोजकका अनुसार हरेक प्रतियोगिताका म्यान अफ द म्याचले नगद २ हजार रुपैयाँ पुरस्कार पाउनेछन् ।