कांग्रेसले आगामी मंसिर ४ गते हुने निर्वाचनका लागि निर्वाचन आयोगमा बुझाएको समानुपातिक उम्मेदवारको बन्दसूची हेरफेर गरेको छ ।

निर्वाचन आयोगले आजसम्म बन्दसूची सच्याउने समय दिएको छ । निर्वाचन आयोगले दिएको समयमा आयोगमा बुझाउने गरी समानुपातिकको सूची सच्याइएको कांग्रेसका एक नेताले जानकारी दिए । 

‘समानुपातिक उम्मेदवारको बन्दसूची सच्याइएको छ । कसलाई राखियो, कसलाई हटाइयो, भन्ने अहिले नै विस्तृतमा भन्न सकिएन’, कांग्रेसका एक नेताले भने ।

कांग्रेसका सभापति एवं प्रधानमन्त्री शेरबहादुर देउवाकी पत्नी आरजू राणा र गृहमन्त्री बालकृष्ण खाँणकी पत्नी मञ्जु खाँणको नाम समानुपातिक उम्मेदवारको अघिल्लो प्राथमिकतामा राखेको विषयमा पनि कांग्रेसका विरोध भइरहेको थियो । 

त्यसैगरी, कांग्रेसको संस्थापन इतर समूहलाई समानुपातिक उम्मेदवारको सूचीमा नसमेटिएको भनेर तीव्र विरोध भएको थियो । उनीहरूले काठमाडौंमा विरोध सभा र धर्नाका कार्यक्रमहरू गरेका थिए । 

अहिले सच्याइएको समानुपातिक उम्मेदवारको सूचीमा आरजू राणा र मञ्जु खाणको नाम केही तल सारिएको कांग्रेसका एक नेताले जानकारी दिए ।

कांग्रेसले सच्याएको समानुपातिक उम्मेदवारको बन्दसूची निर्वाचन आयोगमा बुझाउने जिम्मेवारी कांग्रेस केन्द्रीय कार्यालयका मुख्य सचिव कृष्णप्रसाद पौडेललाई दिइएको छ । 

नेपाली कांग्रेसले यसअघि निर्वाचन आयोगमा बुझाएको समानुपातिक तर्फका उम्मेदवारको बन्दसूचीमा कोइराला पक्षका १३ जनामात्रै परेका थिए । उनीहरू पनि प्राथमिकताक्रमको अन्तिमतिर परेका थिए ।