घुम्टे युवा परिवार, मल्म र जापान शाखाले संयुक्त रूपमा नेपाल भलिबल संघ गलकोटलाई खेलकुद सामग्री प्रदान गरेका छन् ।

संघको गलकोट नगर समितिअन्तर्गत ११ वटै वडाका समितिलाई २ भलिबल, १ जाली र एउटा हावा भर्ने उपकरण प्रदान गरिएको हो ।

घुयुपका अध्यक्ष थम्मन थापा, जापान शाखाका सचिव तुलवीर थापा लगायतको उपस्थितिमा शनिवार ती सामग्री भलिबल संघका जिल्ला अध्यक्ष योगेश भण्डारी र संघका नगर अध्यक्ष हुम थापालाई हस्तान्तरण गरिएको थियो ।

खेलकुद सामग्री १ लाख ५० हजार रुपैयाँ बराबरका रहेका जनाइएको छ ।

राष्ट्रिय खेल भलिबलको प्रवद्र्धनसँगै ग्रामीण भेगका खेलाडीलाई प्रोत्साहन मिलोस् भनेर खेलकुद सामग्री सहयोग गरिएको घुयुप जापान शाखाका अध्यक्ष दिनेश थापाले बताए । उनले जापानमा समेत भलिबल सहितका खेल गतिविधिमा शाखा क्रियाशील रहेको उल्लेख गरेका छन् ।

संघका जिल्ला अध्यक्ष भण्डारीले सुविधा र स्रोतसाधनको अभाव झेलिरहेका ग्रामिण तहका खेलाडीलाई लक्ष्य गरी घुयुपले खेलकुद सामग्री प्रदान गरेकामा खुशी व्यक्त गरे । अध्यक्ष भण्डारीले खेलाडीको व्यावसायिक सुरक्षा र संरक्षणमा राज्यले यथोचित ध्यान पुर्‍याउन नसकेको गुनासो गरे ।

सामाजिक संस्थाका रूपमा स्थापित घुयुपको केन्द्रीय कार्यालय गलकोट नगरपालिका–७ मल्ममा रहे पनि यसका शाखा अरु जिल्ला र विदेशमा समेत क्रियाशील छन् ।

खेलकुद प्रवद्र्धन र मानवीय सेवाका क्षेत्रमा केन्द्रित जापान शाखाले केही महिनाअघि जापानमै ‘सिल्भर रनिङ कप’ खुला पुरुष भलिबल प्रतियोगिता समेत आयोजना गरेको थियो ।