जुम्ली घोडाको संरक्षण र पहिचान स्थापित गर्न  घोडा दौड प्रतियोगिता सम्पन्न भएको छ ।

कर्णाली स्पोर्ट क्लबद्वारा आयोजित प्रतियोगितामा यस वर्ष ३५ घोडा सहभागी भएका थिए ।

करीब १७ वर्षअघिदेखि जुम्ला विमानस्थलमा सञ्चालन हुँदै  आएको प्रतियोगिता बन्द भएपछि क्लबले यसवर्ष पुनः सञ्चालन गरेको क्लबका अध्यक्ष सरोज शाहीले जानकारी दिए । जुम्ली घोडाको संरक्षण, पहिचान र प्रचारप्रसार तथा पर्यटन प्रवद्र्धन गर्ने उद्देश्यले प्रतियोगितालाई निरन्तरता दिएको उनले जानकारी दिए ।

‘समाज विकासका लागि, असल परम्परा बचाइराख्न आवश्यक छ,’ उनले भने, ‘चौडा सडक र अग्ला घर हुनुलाई विकास बुझ्ने मानसिकताले नै हाम्रा मौलिकता लोप हुने स्थितिमा पुगेका छन् । तीन तहै सरकारले सहयोग गरेका छैन । यसले पर्यटन प्रवद्र्धनमा सहयोग पुर्‍याउँछ ।’
 
प्रतियोगितामा चन्दननाथ नगरपालिका–८ का आनन्द धराला, गुठीचौर गाउँपालिका–१ का हरिप्रसाद बस्नेत र गुठीचौर –२ का कालीप्रसाद बोहोरा क्रमशः प्रथम, द्वितीय र तृतीय भएका थिए भने खुलातर्फ विकास बोहोरा, शंकर रोकाया र विपेन बोहोरा क्रमशः प्रथम, द्वितीय र तृतीय भएका क्लबले जनाएको छ ।

पालिततर्फ चन्दननाथ नगरपालिका–१० का हर्कबहादुर शाही, गुठीचौर गाउँपालिका–५ का बीर्खबहादुर भण्डारी र गुठीचौर –२ का मुनसुर बोहोरा क्रमशः प्रथम, द्वितीय र तृतीय भएका क्लबले जनाएको छ ।

प्रतियोगिताको सबै विधामा प्रथम, द्वितीय र तृतीय हुनेलाई क्रमशः ५, ३ र २ हजार रुपैयाँ नगदसहित मेडल र प्रमाणपत्र प्रदान गरिएको थियो ।