नेकपा एकीकृत समाजवादी (एस) पार्टीका नेता एवं पूर्व स्वास्थ्यमन्त्री विरोध खतिवडाको अनौठो हर्कत सामाजिक सञ्जालमा चर्चित भएको छ ।

मंसिर ४ गते हुने प्रतिनिधिसभा निर्वाचनमा मकवानपुरको २ नम्बर क्षेत्रमा सत्तारुढ गठबन्धनबाट उम्मेदवार रहेका खतिवडालाई आफ्नै निर्वाचन क्षेत्रका मतदाताले नचिनेपछि उनले परिचय दिनुपरेको छ ।

मत माग्न पुगेका खतिवडाले आफ्नो परिचय दिँदै भने, ‘विरोध खतिवडा भन्ने बेइमान मै हुँ ।’ मतदाताको समूहमा पुगेर उम्मेदवार खतिवडाले ‘मलाई चिन्नु भो’ भनेर प्रश्न गरेका छन् । मतदाताले चिन्न नसकेको बताएको भिडियो सुन्न सकिन्छ । उनले भने, ‘विरोध खतिवडा भन्ने बेइमान मान्छे मै हो ।’

त्यसलगत्तै सहभागीमध्ये १ वृद्धाले नामै विरोध रहेछ भन्दै हाँसेपछि खतिवडाले भने, ‘विरोध मात्रै हो र ? पछाडि खतिवडा खतरा हो ।’ त्यसपछि हाँसो शुरू भएको भिडियोमा देख्न सकिन्छ ।

चुनाव जितेपछि गाउँ नफर्किने गरेको गुनासो मतदाताले खतिवडासामु राखेपछि अब चुनावसम्म हरेक दिन आउने बताए । उनले मतदातालाई रिझाउन अस्पताल बनाउने, वृद्धाभत्तामा वृद्धि गर्ने लगायतका आश्वासन पनि बाँडेको देखिन्छ ।  नेता खतिवडा २०४६ सालपछि भएका सबै निर्वाचनमा नेकपा एमालेबाट विजयी हुँदै आएका भए तापनि मंसिर ४ गते हुने निर्वाचनमा पहिलोपटक फरक दलबाट चुनावी प्रतिस्पर्धामा होमिएका छन् ।