चालू आर्थिक वर्षको पहिलो ३ महिनामा निक्षेप र कर्जाको वृद्धिदर सुस्त देखिएको छ ।
 
नेपाल राष्ट्र बैंकले बुधवार सार्वजनिक गरेको देशको वर्तमान आर्थिक तथा वित्तीय स्थिति प्रतिवेदनअनुसार असोज मसान्तसम्ममा निक्षेप ० दशमलव ४ र कर्जा १ दशमलव ३ प्रतिशतले मात्रै बढेको देखिएको हो । 

गत आर्थिक वर्षको सोही अवधिमा निक्षेप १ दशमलव २ र कर्जा ७ दशमलव ७ प्रतिशतले बढेको थियो । वार्षिक विन्दुगत आधारमा भने असोजमा बैंक तथा वित्तीय संस्थामा रहेको निक्षेप ८ दशमलव २ प्रतिशतले र कर्जा ६ दशमलव ४ प्रतिशतले बढेको छ । 

राष्ट्र बैंकका अनुसार समीक्षा अवधिमा बैंक तथा वित्तीय संस्थाको कूल निक्षेपमा चल्ती, बचत र मुद्दती निक्षेपको अंश क्रमशः ७ दशमलव ६ प्रतिशत, २६ दशमलव ७ प्रतिशत र ५९ प्रतिशत छ । 

अघिल्लो आवमा यस्तो अंश क्रमशः ७ दशमलव ७ प्रतिशत, ३४ दशमलव ४ प्रतिशत र ५० दशमलव ४ प्रतिशत थियो । असोज मसान्तमा बैंक तथा वित्तीय संस्थाको कूल निक्षेपमा संस्थागत निक्षेपको अंश ३७ प्रतिशत छ ।
 
पहिलो ३ महिनामा बैंक तथा वित्तीय संस्थाबाट निजी क्षेत्रमा प्रवाहित कर्जामध्ये संस्थागत क्षेत्रतर्फ ६३ दशमलव ९ प्रतिशत र व्यक्तिगत तथा घरपरिवार क्षेत्रतर्फ ३६ दशमलव १ प्रतिशत छ । यो अवधिसम्ममा वाणिज्य बैंकको कर्जा प्रवाह १ दशमलव २ प्रतिशत, विकास बैंकको कर्जा प्रवाह २ दशमलव ६ प्रतिशत र वित्त कम्पनीको कर्जा प्रवाह ० दशमलव ३ प्रतिशतले बढेको छ । 

बैंक तथा वित्तीय संस्थाले गरिरहेको कर्जा लगानीमध्ये ६६ दशमलव ७ प्रतिशत कर्जा घरमा र १२ दशमलव २ प्रतिशत कर्जा चालू सम्पत्ति (कृषि तथा गैरकृषिजन्य वस्तु) को धितोमा प्रवाह भएको छ ।