उत्तर कोरियाले शुक्रवार अन्तर्महादेशीय ब्यालिस्टिक क्षेप्यास्त्र परीक्षण गरेको दक्षिण कोरियाको सेनाले जनाएको छ । 

विगत दुई दिनमा उसले दोस्रोपटक यस्तो परीक्षण गरेको हो । आज प्रक्षेपण गरिएको क्षेप्यास्त्र आफ्नो आर्थिक क्षेत्रमा खसेको जापानले जनाएको छ । 

स्थानीय समयअनुसार बिहान सबा १० बजेतिर लामो दूरीको ब्यालिस्टिक क्षेप्यास्त्र प्योङयाङको सुनान क्षेत्रबाट पूर्वी सागरमा खसाइएको दक्षिण कोरियाको जोइन्ट चीफ्स अफ स्टाफले जनाएको छ । 

दक्षिणको राष्ट्रिय सुरक्षा परिषद्ले क्षेप्यास्त्र प्रक्षेपणका विषयमा छलफल गरेको त्यहाँको राष्ट्रपति कार्यालयले जानकारी दिएको छ । 

क्षेप्यास्त्र प्रहारका कारण कुनै जहाज वा विमानमा क्षति नपुगेको बताइएको छ । 

बिहीवार उत्तरले छोटो दूरीको ब्यालिस्टिक क्षेप्यास्त्र प्रक्षेपण गरेको थियो । 

अमेरिकाले जापान र दक्षिण कोरियाको प्रतिरक्षाका लागि प्रतिबद्धता जनाएलगत्तै उत्तरले लगालग क्षेप्यास्त्र प्रक्षेपण गरिरहेको छ ।