प्रदेश–१ का मुख्यमन्त्रीसहित ३ मन्त्रीले अग्रता कायम गरिरहेका छन् । मुख्यमन्त्री राजेन्द्रकुमार राई, आर्थिक मामिला तथा योजना मन्त्री इन्द्रबहादुर आङवो, पर्यटन मन्त्री खिनु लङवा तथा खानेपानी तथा सिञ्चाई मन्त्री रामकुमार राईले अग्रता कायम गरिरहेका छन् । 

भोजपुर–१ बाट प्रदेशसभा सदस्यको उम्मेदवार बनेका राई फराकिलो मतसहित अगाडि छन् । राजेन्द्रले ३५ सय ३७ मत प्राप्त गर्दा एमालेका हरिबहादुर राईले २ हजार ८९ मत ल्याएका छन् । राजेन्द्र राई एकीकृत समाजवादी पार्टीका केन्द्रीय सचिव हुन् । 

प्रदेश–१ का खानेपानी तथा सिञ्चाई मन्त्री समेत रहेका माओवादीका उम्मेदवार रामकुमार राईले खोटाङमा एमाले नेता विशाल भट्टराईलाई पछि परेका छन् । राईले ३ हजार १ मत पाउँदा भट्टराईले २ हजार ५९२ मत पाएका छन् । 

यस्तै, पर्यटन मन्त्री खिनु लङ्वा लिम्बुले ४ हजार ११२ मत ल्याएर अग्रता कायम गरिरहेकी छिन् । उनी एकीकृत समाजवादीकोतर्फबाट प्रदेशसभा सदस्यको उम्मेदवार छिन् । खिनुलाई एमालेकी शोभा पराजुलील्े पछ्याइरहेकी छन् । शोभाले ३ हजार ३५६ मत ल्याएकी छिन । 

आर्थिक मामिला तथा योजना मन्त्री इन्द्र बहादुर आङवोले ४ हजार ५२५ मत प्राप्त गरेका छन् । उनी माओवादी केन्द्रका नेता हुन् । उनलाई एमालेका आइन्द्र सुन्दर नेम्वाङले ३ हजार ६५५ मतसहित पछ्याइरहेका छन् ।