कञ्चनपुरको १ नम्बर निर्वाचन क्षेत्रमा नेकपा एमालेका उम्मेदवार तारालामा तामाङ विजयी भएका छन् ।

निर्वाचन अधिकृतको कार्यालयले सार्वजनिक गरेको अन्तिम मतपरिणामअनुसार उनले ५ हजार ५४६ मतान्तरले माओवादी केन्द्रकी नेत्री तथा पूर्व मन्त्री बिना मगरलाई पराजित गरेका हुन् ।

तामाङले २४ हजार ८९२ मत पाउँदा उनका निकटतम प्रतिस्पर्धी मगरले १९ हजार ३४६ मत प्राप्त गरेकी छन् । विक्रम संवत् २०७४ सालको निर्वाचनमा मगरका सारथी बनेका तामाङले यसपटक मगरलाई फराकिलो मतान्तरले पराजित गरे । तामाङ सुदूरपश्चिम प्रदेशका पूर्व आर्थिक मामिला मन्त्री समेत हुन् । उनी गत भदौमा मात्रै नेकपा एकीकृत समाजवादी पार्टी परित्याग गरी एमाले प्रवेश गरेका थिए ।

नागरिक उन्मुक्ति पार्टीका नन्दकुमार रानाले ८ हजार ६५९ मत प्राप्त गरेका छन् । राष्ट्रिय प्रजातन्त्र पार्टीका दिल्लीबहादुर शाहीले ३ हजार ५३० मत र राष्ट्रिय स्वतन्त्र पार्टीका देवराज जोशीले १ हजार ९०६ मत प्राप्त गरेको निर्वाचन अधिकृतको कार्यालयले जानकारी दिएको छ ।

९१ हजार ११० मतदाता रहेको क्षेत्रमा ६३ हजार ६०४ जनाले मतदान गरेका थिए । ३ हजार ६१४ मत बदर भएको निर्वाचन अधिकृतको कार्यालयले जनाएको छ ।