उद्योग सचिव तोयम रायले रुग्ण उद्योग चलाउने वा नचलाउने विषयमा निजी क्षेत्र र सरकार बसेर छलफल गर्न आवश्यक रहेको बताएका छन् । शुक्रवार उद्योग दिवसको अवसरमा आयोजित कार्यक्रममा बोल्दै सचिव रायले रुग्ण उद्योग चलाउने वा नचलाउने भन्ने बारेमा निजी क्षेत्र र सरकार बसेर छलफल गर्न आवश्यक भएको बताएका हुन् । 

सचिव रायले रुग्ण उद्योगमा प्रयोग भएका मेसिनको पाटपूर्जा बिग्रिएमा विश्वमा नै नपाउने अवस्था रहेकाले निजी क्षेत्र र सरकार बसेर गम्भीर रूपमा छलफल गर्न आवश्यक बताए । उनले सरकारले विराटनगरको जुट मिल, हेटौँडाको कपडा उद्योग र जनकपुरको चुरोट कारखाना सञ्चालनमा ल्याउने भने पनि समस्या रहेको बताए । उनले पछिल्लो समय निजी क्षेत्र चार वस्तुको आयात प्रतिबन्ध भएको विषयलाई ठूलो मुद्दा बनाएको बताए । 

सचिव रायले सरकारले ६ महिनासम्म पाँच वस्तुको आयात खुला गरेको भए थप ५० अर्बको सामान आयात हुने देखिएको बताए । उनले चार वटा वस्तुको आयात प्रतिबन्धले मात्रै उद्योग व्यापारमा माग कमी नभएको बताए । 

‘अहिले हामी सबै आयात प्रतिबन्धमा रोकिरहेका छौँ । पाँच महिनासम्म ५ वडा अहिले आयात जम्मा ४ वडा वस्तु रोकिएको छ । सबै वस्तु खुला गरेर आयात गरेको भए ६ महिना करिब ६ अर्बको वस्तु आयात भएको छ । अरु ५० अर्ब बढीको आयात हुने थियो । विगतको डाटा हेर्दा हुन्छ । यो पनि दुई वटा भन्सारबाट मात्रै हुने थियो । उपभोग वस्तु धेरै आयात भएको छ । यो बीचमा दुई वटा निर्वाचन समेत भए चुनावमा केही खर्च भएको छ । तर, पनि किन समस्या भयो । समस्या सरकार र निजी क्षेत्र दुवैसँग छ’, उनले भने, ‘उद्योग बनाउनको लागि जग्गा लिन समस्या छ । उद्योग बनाउने  थाहा पाउने बित्तिकै एक रातमा नै जग्गाको मूल्य बढ्छ । सरकारले रुग्ण उद्योग चलाउने  कुरा गरेको छ । त्यस्ता उद्योग सञ्चालनमा ल्याउने वा नचालउने विषयमा निजी क्षेत्र र सरकार बसेर छलफल गर्नुपर्ने बेला आएको छ ।’

त्यस्तै वाणिज्य सचिव डा. तोयनारायण ज्ञवालीले सरकारले सोचे जस्तो विदेशी लगानी आउन नसकेको बताए । उनले नेपालजस्तै देश भियतनाम, कम्बोडियाजस्ता देशहरूमा जीडिपीको १५ प्रतिशतसम्म पुगेको बताए । उनले नेपालमा भने जिडीपीको १ प्रतिशतमा रहेको बताए । 

उनले उद्योगहरुको अन्तराष्ट्रिय देशहरुमा गुणस्तर तथा लागतको हिसावले प्रतिष्पर्धा गर्न सक्नुपर्ने अवस्था रहेको बताए । उनले  मन्त्रालयले अहिले आएका नयाँ स्टार्टअप उद्यमको क्षेत्रमा पनि जान आवश्यक रहेकाले मन्त्रालयले काम गर्ने बताए ।