नेकपा एमालेका सचिव छविलाल विश्वकर्मा तेस्रो पटक संसद् प्रवेश गर्दैछन् ।

सचिव विश्वकर्मा यसपटक पनि रुपन्देहीको १ नम्बर निर्वाचन क्षेत्रबाट निर्वाचित भएका छन् ।

उनले आफ्नै पूर्व सहकर्मी घनश्याम भुसाललाई ३ हजार ५६४ मतान्तरले पराजित गरेका हुन् ।

बुटवल उपमहानगरपालिका–११ का स्याथी वासिन्दा विश्वकर्मा २०१९ मंसिर २३ गते स्याङ्जा जिल्लामा जन्मिएका हुन् । विक्रम संवत् २०७४ सालको निर्वाचनमा सोही क्षेत्रबाट विजयी भएका उनी यसपटक २४ हजार ८७२ मत ल्याई प्रतिनिधिसभा सदस्यमा निर्वाचित भए । निकटतम प्रतिस्पर्धी भुसालले २१ हजार ३०८ मत प्राप्त गरे । भुसालले एमालेबाट टिकट नपाएपछि पार्टी परित्याग गरी सत्ता गठबन्धनको समर्थनमा स्वतन्त्र उम्मेदवारी दिएका थिए ।

स्व. चन्द्रबहादुर विश्वकर्मा र गंगाजमुना विश्वकर्माको कोखबाट जन्मिएका विश्वकर्माले २०३७ सालमा नेकपा मालेबाट आफ्ना राजनीतिक यात्रा आरम्भ गरेका हुन् । उनी विक्रम संवत् २०३७ सालमा अनेरास्ववियु पाँचौं उपसभापति (बुटवल बहुमुखी क्याम्पस), २०५१ सालमा नेकपा एमालेको राष्ट्रिय परिषद् सदस्य र २०५८ सालमा एमालेको वैकल्पिक केन्द्रीय सदस्य बनेका थिए ।

सचिव विश्वकर्मा २०६५ सालमा पार्टीको केन्द्रीय कमिटी तथा पोलिटब्यूरो सदस्य हुँदै २०७५ सालमा स्थायी कमिटी सदस्य बनेका थिए ।

विक्रम संवत् २०६४ सालमा कृषि तथा सहकारीमन्त्री बनेका विश्वकर्मा २०५१ सालमा राष्ट्रिय खेलकुद परिषद्को सदस्य र २०५५ सालमा उपेक्षित, उत्पीडित र दलित वर्गको उत्थान विकास समितिको उपाध्यक्ष बनेका थिए ।

आफूलाई सामाजिक न्याय र समानताको पक्षधर राजनीतिज्ञका रूपमा परिचित गराउन चाहने विश्वकर्माले तत्कालीन मालेबाट राजनीतिक यात्रा शुरू गरेका हुन् । गीत, लेख, रचनामा विशेष रुचि राख्ने विश्वकर्मा २०६४ सालमा समानुपातिक तर्फबाट एमालेको तर्फबाट संविधानसभा सदस्य चयन भएका थिए ।