सत्ता गठबन्धनसहितको चौतर्फी घेराबन्दी र पार्टीभित्रकै कतिपय नेताको असहयोगका बाबजुद एमाले उपाध्यक्ष विष्णु पौडेलले रूपन्देही– २ बाट रोमाञ्चक जीत निकालेका छन् ।

शुक्रवार साँझ अबेर सम्पन्न मतगणनामा पौडेलले १ हजार ३ सय ६६ मतान्तरसहित जीत दर्ता गरेका हुन् । एमाले उम्मेदवार पौडेलले २७ हजार १ सय ७४ मत ल्याउँदा राष्ट्रिय स्वतन्त्र पार्टीका गणेश पौडेलले २५ हजार ७ सय ८१ मत पाए । 

सत्ता गठबन्धनले सघाएका राष्ट्रिय जनमुक्ति पार्टीका केशवबहादुर थापा तेस्रो स्थानमा रहे । उनले २२ हजार ८ मत ल्याए । पछिल्ला चारवटा निर्वाचनमा लगातार विजयी हुने पौडेल एमालेका सीमित नेतामा पर्छन् ।

२०६४ र २०७० सालको निर्वाचनमा उनले माओवादीका उम्मेदवारलाई पराजित गरेका थिए । पौडेलसँग माओवादी नेता एवं पूर्वप्रधानमन्त्री डा. बाबुराम भट्टराई पराजित भएका थिए । 

२०७४ सालको प्रतिनिधिसभा निर्वाचनमा नेपाली कांग्रेसका युवराज गिरी पौडेलसँग पराजित भएका थिए । 

हार्न नजानेका नेता 

सत्ता गठबन्धनले भागबण्डा गर्दा रूपन्देही– २ नेकपा एसको भागमा परेको थियो । नेकपा एसले राजु गुरुङलाई उम्मेदवार बनाएकोमा बैंकिङ कसूर मुद्दामा गुरुङको उम्मेदवारी खारेज भयो । त्यसपछि सत्ता गठबन्धनले जनमुक्ति पार्टीका उम्मेदवारलाई समर्थन गर्‍यो । 

आफ्नो उम्मेदवार नभए पनि सत्ता गठबन्धन र त्यसमा पनि नेपाली कांग्रेसले ‘एनी हाउ, पौडेल हराऊ’ भन्ने नारा लगाएको थियो । सिंगो रूपन्देहीको विकासमा पौडेलले खेलेको भूमिकाका कारण मतदाताले भोट खसालेपछि उनीविरुद्धका विपक्षीका अस्त्र असफल भए । 

पार्टीकै जिल्ला तहका नेताले पनि पौडेललाई खुलेर समर्थन गरेका थिएनन् । ‘विगतमा विष्णु कमरेडले नै स्थापित गरेका कतिपय नेताले खुलेर समर्थन गरेनन्, कोही देखावटीरूपमा मात्र चुनावी कार्यक्रममा सहभागी भए,’ रूपन्देहीका एक एमाले नेताले भने, ‘तर पनि रूपन्देहीमा गरेको विकासका लागि जनताले न्याय गरे ।’

पार्टीका प्रतिबद्ध कार्यकर्ताको भोट १५ हजार आसपास रहे पनि उनले पाएको थप १२ हजार भोट भने रूपन्देहीको विकासका लागि खेलेको भूमिकाकै कारण स्वतन्त्र मतदाताबाट आएको विश्लेषण उनको छ । 

रूपन्देही– २ का मतदाता कृष्ण गौतम पार्टीभन्दा पनि यस क्षेत्रको विकास हेरेर पौडेललाई भोट दिएको बताउँछन् । 

‘बुटवललाई पश्चिम नेपालकै आधुनिक शहर बनाउन विष्णु पौडेलले खेलेको भूमिका भावी पुस्ताले पनि बिर्सन सक्दैन,’ गौतमले भने, ‘बुटवलको विकासको प्रतिफल रूपन्देही मात्र होइन, छिमेकी जिल्लाले पनि लिइरहेका छन् ।’ 

पौडेल नेपालका एक सफल अर्थमन्त्रीको रूपमा परिचित छन् । २०७३ सालमा पहिलोपटक अर्थमन्त्री रहेको समयमा पौडेलले तराई मधेशका जिल्ला सदरमुकाम जोड्ने बाटो विस्तारका लागि बजेट छुट्ट्याएका थिए । 

केपी ओली प्रधानमन्त्री रहेको समयमा पौडेलले छुट्ट्याएको बजेटले तराईका जिल्लामा विकासले फड्को मारेको छ । 

पढ्नुहोस्, यो पनि :

रूपन्देही– २ का ४ सय मतदातासँग कुरा गर्दा विष्णु पौडेलको पक्षमा देखिएको माहोल