मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचनमा बागलुङ जिल्लामा ४.५२ प्रतिशत मत बदर भएको छ ।

गत स्थानीय तहको निर्वाचनमा १० प्रतिशत मत बदर भएकामा अहिले मत बदर संख्या कम भएको हो ।

जिल्लामा खसेको १ लाख ५ हजार ८४६ मतमध्ये ४ हजार ७८९ मत मात्र बदर भएको मुख्य निर्वाचन अधिकृत डा. दिवाकर भट्टले जानकारी दिए ।

उनका अनुसार अझै मत बदर संख्या घटाउने आयोगको तयारी भए पनि नागरिकको राजनीतिप्रतिको वितृष्णा, अशिक्षा र मतदाता शिक्षाको पहुँच नपुग्नुका कारण मत बदर भएको हो । मुख्य निर्वाचन अधिकृत डा. भट्टका अनुसार स्थानीय तहमा भएको मत बदरभन्दा अहिलेको मत बदर संख्यामा उल्लेख्य मात्रामा सुधार भएको छ ।

बागलुङ–१ मा ५४ हजार ७११ र क्षेत्र नम्बर २ मा ५१ हजार १३५ मत खसेको थियो । जिल्लामा मतदाता संख्याको हिसाबले ५३ प्रतिशत मत खस्दा ४ हजार ७८९ मत बदर भएको छ । 

बागलुङको क्षेत्र नम्बर १ मा ५४ हजार ७११ मत खसेकोमा १ हजार ७१४ मत बदर भई ५२ हजार ७८० मत सदर भएको थियो भने बागलुङ क्षेत्र नम्बर २ मा ५१ हजार १३५ मत खस्दा ३ हजार ७५ मत बदर भएर ४८ हजार ६० मत सदर भएको उनले जानकारी दिए ।

‘स्थानीय तहको मत बदर संख्या उल्लेख्य रहेको भन्दै यसपटक निर्वाचन आयोगले वडा तहमा मतदाता शिक्षालाई प्रभावकारी बनाएका कारण मत बदर संख्या घटेको हो,’ उनले भने, ‘स्थानीय तहमा बागलुङमा १० प्रतिशत मत बदर भएको थियो, अहिले ४ प्रतिशत मत बदर घटाएका छौं, मतपत्र सजिलो भएको, मतदाता शिक्षाका कारण बदर मत घटे पनि बदर मतलाई अझै तल झार्नुपर्ने आजको आवश्यकता हो ।’

सानो मतपत्र, चुनाव चिह्न थोरै र एक मतपत्रमा एक मात्रै चिह्न लगाउनुपर्ने भएकाले बदर मत न्यून हुने अनुमान निर्वाचन आयोगको भए पनि बदर मत ४ प्रतिशत भएको हो । स्थानीय तहको तुलनामा थोरै भए पनि अहिलेको राजनीतिक दलको सक्रिय मतदाता शिक्षा, निर्वाचन आयोगले स्थानीय तहसँग मिलेर गरेको मतदाता शिक्षालगायतको सक्रियता हेर्दा मत बदर २ प्रतिशतभन्दा थोरैमा लैजाने लक्ष्य भए पनि सोचेजस्तो नभएको हो ।