दुई मन्त्रीको क्षेत्रमा लफडा हुँदा समयमा निर्वाचनको परिणाम आउन सकेको छैन । परराष्ट्रमन्त्री डा.नारायण खडका र सञ्चारमन्त्री ज्ञानेन्द्रबहादुर कार्कीको क्षेत्रमा ‘लफडा’ भएका कारण समग्र निर्वाचन परिणाम नै अवरुद्ध भएको छ । मन्त्रीद्वयको क्षेत्र उदयपुर–१ र सुनसरी–४ मा मतगणना रोकिएको हो । 

उदयपुर–१ मा परराष्ट्रमन्त्री खड्का र नेकपा एमालेकी मन्जुकुमारी चौधरी उम्मेदवार छन् । त्यहाँ विवाद हुँदा मतगणना रोकिएको छ । त्यसै गरी सुनसरी–४ मा सञ्चारमन्त्री कार्की र नेकपा एमालेका उम्मेदवार जगदीशप्रसाद कुशियैतबीच विवाद हुँदा मतगणना रोकिएको छ । उक्त दुई क्षेत्रमा नेताहरूबीच रहेको विवादका कारण मतगणना रोकिएको निर्वाचन आयोगका प्रमुख निर्वाचन आयुक्त दिनेश कुमार थपलियाले जनाएका छन् ।

‘ठूला–ठूला नेताहरू एक आपसमा लाप्पा खेलिरहनु भएको छ, उहाँहरूबीच सहमति नहुँदासम्म मतपरिणाम आउन कठिन देखिएको छ’, थपलियाले लोकान्तरसँग भने, ‘उहाँहरूबीच सहमति भयो भने आज रातिसम्ममा परिणाम आउँछ ।’

त्यसबाहेक बाजुरा, दोलखा र स्याङजा–२ मा मतगणना रोकिएको छ ।