श्रम, रोजगार तथा सामाजिक सुरक्षामन्त्री शेरबहादुर कुँवरले समाजिक सुरक्षा कोष आवद्ध श्रमिकका परिवारलाई उद्यमशीलतामा जोड्न सरकार लागिपरेको बताएका छन् । आइतवार पाँचौ सामाजिक सुरक्षा दिवसको अवसरमा आयोजित कार्यक्रममा बोल्दै उनले  समाजिक सुरक्षा कोष आवद्ध श्रमिकका परिवारलाई उद्यमशीलतामा जोड्न सरकारले काम गरिरहेको बताएका हुन् ।

मन्त्री कुँवरले सामाजिक सुरक्षा कोषको दायरा बढाउँदै कार्यविधिमा छुटेका वस्तुहरु समावेश गरी रोजगारी सिर्जना गरेर सामाजिक सुरक्षा कोषसँग जोड्ने बताए । उनले सामाजिक सुरक्षा कोषमा रहेको एक प्रतिशत करलाई सामाजिक सुरक्षा कोषमा ल्याउने गरी छलफल भइरहेको जानकारी दिए । उनले सामाजिक सुरक्षा कोषमा योगदान गरेको रकम उत्पादन क्षेत्रमा लगानी गर्दा मात्रै मुलुकको आर्थिक विकासमा सहयोग पुग्ने बताए । 

मन्त्री कुँवरले कोषले प्रविधिमा आधारित गुणस्तरीय सेवा प्रवाह गर्दै कोषले संकलित रकम कुशलतापूर्वक प्रयोग गर्न आवश्यक रहेको बताए । उनले नेपालमा सरकार अस्थिर भएको भन्दै अब स्थिर सरकार बनाउनु आवश्यक रहेको बताए । उनले दुई तिहाईको सरकार हुँदासमेत स्थिर सरकार बनाउन नसकेकाले सबैले स्थिर सरकार बनाउनको लागि गम्भीर हुन आवश्यक रहेको बताए । 

त्यस्तै, श्रम रोजगार तथा सामाजिक सुरक्षा मन्त्रालयका सचिव एकनारायण अर्यालले सामाजिक सुरक्षा कोषमा आवद्ध हुन बैंक तथा उद्योगहरु अलमलमा परेको बताए । उनले सामाजिक सुरक्षा कोषमा आबद्ध हुन कुनै पनि क्षेत्रहरु अलमलमा पर्न आवश्यक नभएको बताए । उनले अलमलमा परेका बैंकिङ क्षेत्र, रोजगारदाता उद्योग तथा प्रतिष्ठानहरु अलमलमा रहेकाले उद्योग परिसंघ,चेम्बर र वाणिज्य महासंघसँग पनि छलफल गरिरहेको बताए । 

उनले रोजगारदाताहरुले श्रमिकहरुलाई प्रात्साहन गर्नसके वार्षिक रुपमा ३ प्रतिशतले प्रतिष्ठानकाे नाफा बढ्ने अन्तर्राष्ट्रिय सर्वेक्षणले देखाएको बताए । उनले उद्योगहरूले नाफा कमाउँदै जाने तर श्रमिकको हितमा काम नगर्दा देशको अर्थतन्त्रसमेत विकास हुन नसक्ने दाबी गरे ।