मुस्ताङबाट यस वर्ष ५० करोड मूल्य बराबरको स्याउ निकासी भएको छ । 

मुस्ताङमा उत्पादन भएको ६ हजार ६०० मेट्रिकमध्ये ७० प्रतिशत अथवा ४ हजार ६२० मेट्रिक स्याउ निकासी भएको कृषि ज्ञान केन्द्रले जनाएको छ ।

गत भदौमा प्रतिकिलो १०० रुपैयाँका दरले बिक्री भएको मुस्ताङको स्याउको मूल्य मंसिरको पहिलो साता आइपुग्दा प्रतिकिलो १२० देखि १३० सम्म भएको छ । सरदर प्रतिकिलो ११० रुपैयाँका दरले स्याउ बिक्री भएको कृषकहरुले बताएका छन् । 

यस अनुसार निकासी भएको स्याउको मूल्य ५० करोड ८२ लाख हुन आउँछ । केन्द्रका प्रमुख प्रकाश बस्ताकोटीले गत वर्षका तुलनामा यसपालि १८.५६ प्रतिशतले स्याउ उत्पादन बढेको जानकारी दिए ।

‘बगैंचामा पुगेर क्रप कटिङ र सोधपुछ गर्दा उत्पादन बढेको पाइयो,’ उनले भने, ‘अनुकूल मौसमले उत्पादकत्व, क्षेत्रफल र नयाँ विरुवा थपिएकाले उत्पादन बढेको हो ।’ 

कूल ५८० हेक्टर जमिनमा लगाइएको स्याउ बोटले उत्पादन दिएको छ । 

जिल्लाको ५ वटै स्थानीय तहमा १ हजार ४७५ हेक्टर जमिनमा स्याउ खेती गरिएको छ । क्रप कटिङ सर्वेक्षण गर्दा जिल्लामा प्रतिहेक्टर ११.३७ मेट्रिकटन स्याउ उत्पादन हुने पाइएको प्रमुख बस्ताकोटीले बताए । 

यसैगरी जिल्लामा कूल स्याउ उत्पादनमध्ये यसवर्ष ४४० मेट्रिकटन उच्च घनत्व प्रविधिमा आधारित स्याउको उत्पादन भएको छ । जिल्लामा ३८ हेक्टर जमिनमा उच्च घनत्व प्रविधिमा आधारित स्याउ खेती गरिएको छ । तीमध्ये २२ हेक्टरका बगैंचाले उत्पादन दिइरहेका छन् ।