अमेरिका र इरानबीच तनावपूर्ण सम्बन्ध रहेको अवस्थामा नेपाली समयअनुसार बिहान पौने १ बजेबाट शुरू हुन लागेको फूटबल खेलले धेरैको ध्यान तानेको छ । 

४० वर्षअघि सम्बन्ध तोडेका यी दुई मुलुकबीच विश्वकपअन्तर्गत हुने लागेको खेलमा अतिरिक्त सुरक्षाको व्यवस्था गरिएको छ । गत सेप्टेम्बर १६ मा २२ वर्षीया माहसा अमिनीको मृत्युपछि इरानभरि चर्किएको विरोध प्रदर्शनको बाछिटा कतारमा समेत परेर तनाव चर्किन सक्ने भएकाले अतिरिक्त सुरक्षा व्यवस्था गरिएको हो । 

इरानी विरोधकर्ताहरूसँग एक्यबद्धता प्रदर्शन गर्नका लागि अमेरिकाको फूटबल महासंघले आफ्नो सामाजिक सञ्जाल अकाउन्टमा इरानको राष्ट्रिय झण्डालाई गलत तरिकाले प्रस्तुत गरेको थियो । झण्डामा इस्लामिक गणतन्त्रको प्रतीक नै थिएन । 

इरानले त्यसको विरोध फिफासमक्ष गरेको छ । इरानी अधिकारीहरूले अमेरिकालाई प्रतियोगिताबाटै निकाल्नुपर्ने बताएका छन् । 

कतारले अमेरिकासँग बलियो सम्बन्ध बनाएको छ भने ऊ इरानको पनि साथी हो । त्यसैले भोलिको खेलमा सुरक्षा व्यवस्था बलियो बनाउने तनाव उसलाई छ । इरानलाई चिढ्याउने कुनै पनि चिह्न रंगशालामा ल्याउन उसले प्रतिबन्ध लगाएको छ ।