हिमश्री फुड्सले प्रालिले चर्चित आहा रारा पोखरा गोल्डकप फूटबल प्रतियोगितालाई थप १० वर्ष मुख्य प्रायोजन गर्ने भएको छ । 

सहारा क्लब पोखराले २० वर्षअघिदेखि सञ्चालन गर्दै आएको फूटबल प्रतियोगितालाई हिमश्री फुड्सले शुरूआतदेखि नै मुख्य प्रायोजन गर्दै आएकोमा थप १० वर्षका लागि तेस्रोपटक साथ दिने गरी सम्झौतामा मंगलवार हस्ताक्षर गरिएको हो ।

सम्झौतामा हिमश्री फूड्स प्रालिका कार्यकारी अध्यक्ष प्रेमकुमारी केसी र क्लबका अध्यक्ष हरिराम गुरुङ ‘सुरज’ले हस्ताक्षर गरेका छन् ।

सम्झौताअनुसार सहारा क्लबलाई मुख्य प्रायोजक हिमश्री फुड्स प्रालिले वार्षिकरूपमा आगामी पहिलो ३ वर्ष १८ लाख रुपैयाँ, दोस्रो ३ वर्ष २१ लाख रुपैयाँ, तेस्रो ३ वर्ष २४ लाख रुपैयाँ र विक्रम संवत् २०८८ सालमा २७ लाख रुपैयाँ सहयोग गर्नेछ । हिमश्री फुड्सले यसअघि २ पटकसम्म प्रतियोगितालाई १०/१० वर्ष मुख्य प्रायोजकको रूपमा सहयोग गर्दै आएको छ । 

समाजसेवी उद्योगपति एवं पूर्व सांसद स्व. सूर्यबहादुर केसीको पहलमा विक्रम संवत् २०५९ सालमा आहा गोल्ड कपबाट १० वर्ष सम्झौता भएको थियो भने विक्रम संवत् २०६९ देखि २०७८ को लागि दोस्रो पटक आहा रारा गोल्डकपका नाममा सञ्चालन हुँदै आएको हो ।

विगतमा आहा राराका नाममा सञ्चालन हुँदै आएको प्रतियोगिता आगामी संस्करणदेखि आहा रारा पोखरा गोल्डकप फूटबलका नामबाट सञ्चालन हुने सहाराका महासचिव रामजीप्रसाद अधिकारीले बताए ।

कार्यक्रममा प्रालिका निर्देशक किरण केसीले सहारा क्लबको समाजसेवामा थप १० वर्ष जोडिन पाएकोमा खुशी व्यक्त गरे । पोखराको खेलकुदलाई प्रोत्साहन गर्ने आफूहरूको उद्देश्य रहेको उनले बताए । केसीले भने, ‘सहारा क्लब प्रतियोगिता मात्र होइन, समाजसेवामा पनि जोडिएको छ । त्यसैले सकारात्मक काममा हाम्रो उत्पादनसँगै जोडिन पाएकोमा हामी केसी परिवार खुशी छौं ।’