साइबर ब्यूरोले युट्युबमा म्यादी प्रहरीलाई गाली गलौज गरेको आरोपमा एक युवकलाई पक्राउ गरेको छ । प्रहरीले मकवानपुर हेटौँडा उपमहानरपालिका–४ हुप्राचौरबाट प्रदीप खड्का भन्ने नविन खड्कालाई पक्राउ गरेको ब्यूरोका प्रहरी निरीक्षक (इन्स्पेक्टर) राजकुमार खड्गीले जानकारी दिए ।

तथानाम गाली गरेर एक जना भ्लगरले भिडियो बनाएका छन् भन्ने उजुरी प्रहरी प्रधान कार्यालयमा एउटा उजुरी आएको थियो । युट्युब हेर्दै गर्दा एक जना प्रहरीले उक्त भिडियो देखेपछि प्रहरी प्रधान कार्यालयमा उजुरी गरेका थिए । उजुरी आएपछि प्रहरी हेडक्वार्टरले साइबर ब्यूरोलाई भिडियो खोज्न र त्यो अपलोड गर्ने व्यक्तिलाई कारबाही गर्न निर्देशन दियाे । निर्देशन प्राप्त भएपछि ब्यूरोले युट्युबको टाइटलका आधारमा अनुसन्धान थालेको थियो । 

अनुसन्धान गर्दा सामाजिक सञ्जालमा प्रदीप खड्का नाम भएको युट्युब र फेसबूकमा जथाभावी म्यादी प्रहरीलाई गाली-गलौज गरेको भिडियो फेला परेको साइबर ब्यूरोका इन्स्पेक्टर खड्गीले बताए । 

‘हेडक्वार्टरको निर्देशनपछि हामीले टाइटलका आधार भिडियो खोज्यौँ’, इन्स्पेक्टर खड्गीले भने, ‘उसले अपलोड गरेको भिडियोको लोकेशनमा आधारमा पक्राउ गर्न सफल भएका हौँ ।’

खड्गीका अनुसार उनले फेसबुक र युट्युब भिडियोमा ‘आयो है भ्लग म्यादीहरूको’ शीर्षक दिएर म्यादी प्रहरीलाई तथानाम गाली–गलौज गरेका थिए । उनले भिडियोमा ‘म्यादी पुलिस कुकुर हो, चुनाव आयोग घ..टा आयो’जस्ता गाली गलौज गरेका थिए । 

त्यति मात्र होइन उनले भिडियोमा फोहोर तथा अपशब्दहरू बोल्ने, एउटा बाइकमा ३ जना बसेर चलाएर प्रहरीलाई च्यालेन्ज गर्नेजस्ता गतिविधि गरेका थिए । उनले प्रहरीहरूलाई पनि गाली गलौज गर्ने, मान मर्दन हुने खालको कृयाकलाप गरेका थिए । प्रहरीको मान मर्दन गरेको आरोपमा उनलाई पक्राउ गरिएको ब्यूरोका प्रवक्ता उप निर्र्देशक एसपी पशुपतिकुमार रायले जानकारी दिए ।

प्रहरीले खड्कालाई जिल्ला प्रहरी कार्यालय मकवानपुरको सहयोगमा मंसिर १३ गते पक्राउ गरेको थियो । प्रहरीले उनलाई ७ दिनको म्याद थप गरेर अनुसन्धान गरिरहेको छ ।