अर्जेन्टिना र पोल्याण्ड कतारमा जारी विश्वकप फूटबल प्रतियोगितको नकआउट चरणमा प्रवेश गरेका छन् । 

बिहीवार भएको खेलमा अर्जेन्टिनाले पोल्याण्डलाई पराजित गर्दै नकआउट चरणमा प्रवेश गरेको हो ।

समूह ‘सी’को अन्तिम खेलमा अर्जेन्टिनाले पोल्याण्डलाई २–० गोलअन्तरले हराएको हो । 

अर्जेन्टिनाका लागि एलेक्सिस म्याक एलिस्टर र जुलियन अल्भारेजले १/१ गोल गरे । खेलको ३९औं मिनेटमा अर्जेन्टिनाका कप्तान लियोनल मेस्सी पेनाल्टीमा गोल गर्न चुकेका थिए तर खेलको ४६औं मिनेटमा एलिस्टरले गोल गर्दै अर्जेन्टिनालाई शुरूआती अग्रता दिलाए । 

त्यसपछि खेलको ६७औं मिनेटमा अल्भारेजले गोल गर्दै अर्जेन्टिनालाई २–० गोलको जित दिलाए । जीतसँगै अर्जेन्टिना समूह ‘सी’को विजेता बन्न सफल भयो । अर्जेन्टिनाले ३ खेलमा २ जीत र १ हारसहित ६ अंक जोड्यो । पोल्याण्ड पनि समूहको उपविजेता बन्दै नकआउट चरणमा पुग्यो । 

त्यसैगरी बुधवार राति कतारको लुसाइल रंगशालामा  सम्पन्न खेलमा मेक्सिकोले साउदी अरबलाई २–१ गोल अन्तरले पराजित गर्‍यो । खेलको ४७औं मिनेटमा हेनरी मार्टिनले गोल गर्दै मेक्सिकोलाई शुरूआती अग्रता दिलाएका छन् ।

खेलको ५२औं मिनेटमा लुइस चाभेजले गोल गर्दै मेक्सिकोलाई २–० को अग्रता दिलाए । त्यसपछि खेलको दोस्रो हाफको अतिरिक्त समयमा साउदी अरबका सलिम अल्दावसरीले सान्त्वना गोल गरे । 

समूह ‘सी’बाट साउदी अरब र मेक्सिको समूह चरणबाट बाहिरिएका छन् । ४ अंक जोडेको मेक्सिको तेस्रो स्थानमा रह्यो भने ३ अंक जोडेको साउदी अरबले अन्तिम स्थानमा रहँदै विश्वकपको यात्रा टुंग्यायो ।