झापामा ४ महिनाको अवधिमा ३७ एचआईभी एड्स संक्रमित थपिएका छन् ।

यस वर्षको साउनदेखि कात्तिकसम्ममा ३७ एचआईभी एड्स संक्रमित थपिएका हुन् । 

स्वास्थ्य कार्यालय झापाका एचआईभी एड्स फोकल पर्सन वीरेन्द्र दासका अनुसार दमकस्थित दमक अस्पतालमार्फत औषधि सेवन गर्ने गरी ११ तथा प्रादेशिक अस्पताल भद्रपुरमार्फत औषधि सेवन गर्ने गरी २६ एचआईभी संक्रमित थपिएका हुन् ।

गत वर्ष ३० जनामा एचआईभी एड्स संक्रमण भएको थियो । जिल्लामा हाल ६३६ एचआईभी संक्रमितले नियमित औषधि (एआरटी) सेवन गरिरहेका छन् ।

दमक अस्पतालअन्तर्गत २११ र प्रादेशिक अस्पताल भद्रपुरअन्तर्गत ४२५ जनाले एआरटी औषधि सेवन गरिरहेको स्वास्थ्य कार्यालयले जनाएको छ । ‘एड्स अन्त्यका लागि समानताको सुनिश्चितता गरौं’ नाराका साथ बिहीवार जिल्लामा विविधि कार्यक्रम गरी ‘विश्व एड्स दिवस’ मनाइँदैछ ।