आतंकवादी संगठन इस्लामिक स्टेटका प्रमुख अबू अल–हसन अल हाशिमी अल कुरैशी युद्धमा मरेको घोषणा गरिएको छ । 

आईएसका प्रवक्ताले बुधवार एउटा अडियो जारी गरेर यसको जानकारी दिए । उनले विस्तृत विवरण भने प्रस्तुत गरेनन् । 

सन् २०२२ मा मारिने आईएसका उनी दोस्रा नेता हुन् । 

अहिले आईएस स्लीपर सेललाई सक्रिय बनाएर इराक र सिरियामा घातक आक्रमण गर्न खोजिरहेको बताइन्छ । अफगानिस्तानमा रहेको उसको शाखा आईएसकेपीले पनि लगातार आक्रमणहरू गरिरहेको छ । 

अल कुरैशी अक्टोबर महिनामा मारिएको अमेरिकी सेनाले जानकारी दिएको थियो । सिरियाको दक्षिणी भागमा रहेको दारामा उसको मृत्यु भएको हो । 

आईइसले घटनाको एक महिनापछि आएर किन मृत्युको घोषणा गरेको हो स्पष्ट हुन सकेको छैन । 

अब उनको ठाउँमा अबु अल–हुसेन अल–हुसेनी अल–कुरैशीले आईएसको नेतृत्व गर्नेछन् ।