दोलखामा प्रतिनिधिसभा सदस्यमा सत्ता गठबन्धनका उम्मेदवारले अग्रता लिएका छन् ।

हालसम्म ४ हजार ४९४ मतगणना हुँदा सत्ता गठबन्धनबाट नेकपा माओवादी केन्द्रका उम्मेदवार गंगा कार्कीले २ हजार ९१० मत प्राप्त गरेका छन् ।

उनका निकटतम प्रतिद्वन्द्वी नेकपा एमालेका बालकृष्ण शिवाकोटीले १ हजार १८३ मत प्राप्त गरेका छन् ।

मुख्य निर्वाचन अधिकृत डिल्लीरत्न श्रेष्ठका अनुसार दोलखाको प्रदेशसभा (१) मा ३ हजार ९६६ मतगणना गर्दा सत्ता गठबन्धनबाट उम्मेदवार नेपाली कांग्रेसका कुन्दनराज काफ्लेले २ हजार १८३ मत तथा एमालेका नरबहादुर श्रेष्ठले १ हजार ३२७ मत ल्याएका छन् ।

प्रदेशसभा (२) मा ४ हजार ४५३ मतगणना हुँदा एमालेका भरत केसीले २ हजार १८५ र कांग्रेसका बर्मा लामाले १ हजार ८५७ मत प्राप्त गरेका छन् ।

दोलखाको १० मतदान केन्द्रमा बिहीवार पुनः मतदान भएको थियोे । बाँकी स्थानमा मंसिर ४ गते मतदान भएको थियो ।

दोलखामा जम्मा ९४ मतदानस्थल र १९५ मतदान केन्द्र रहेका थिए । कूल १ लाख ६१ हजार ४५० मतदाता रहेका थिए भने १४ राजनीतिक दलका र ७ स्वतन्त्र गरी २१ उम्मेदवार चुनावी मैदानमा सहभागी भएका थिए ।