नेकपा एमालेकी पोलिटब्युरो सदस्य शान्ता चौधरी काठमाडौंको थापाथलीस्थित सुकुम्बासी बस्तीमा पुगेकी छिन् । 

काठमाडौं महानगरपालिका र अधिकार सम्पन्न बागमती सभ्यता एकीकृत विकास समितिले अव्यवस्थित बसोबासीलाई हटाउन बल प्रयोग गरेपछि त्यहाँका सुकुम्बासी आन्दोलित भएका छन् ।

महानगरको पेलानमा परेका सुकुम्बासीका मागमा ऐक्यबद्धताका लागि उनी थापाथली पुगेकी हुन् । 

‘थापाथलीस्थित सुकुम्बासी बस्तीमा आएर अन्तरक्रिया गरें । उहाँहरूले हाम्रो व्यवस्थापन गरिदिनुस्, बस्ती छाड्न तयार छौं भनेर भन्नुभएको छ । विकल्पविना हामीलाई नहटाइयोस् । हुकुम्बासीका नाममा हामी सुकुम्बासीलाई जोडेर सधैँ हाम्रो अपमान गर्ने काम नहोस् भन्ने उहाँहरूको भावना पाएँ,’ चौधरीले भनिन् । 

कमलरी पृष्ठभूमिबाट राजनीतिमा आएकी शान्ता आफैँ पनि भूमिहीन हुन् । विगतमा उनी राष्ट्रिय भूमि अधिकार मञ्चसँग आबद्ध थिइन् ।