विवाहको सिजन शुरू भएको छ । कलाकारहरू पनि धमाधम वैवाहिक सम्बन्धमा जोडिँदैछन् । अभिनेता सलोन बस्नेतले गत सोमबार विवाह गरे । 

अभिनेता संयम पुरी र अभिनेत्री आश्मा डीसी आज (शुक्रबार) वैवाहिक सम्बन्धमा जोडिँदैछन् । करीब १० वर्षको प्रेम सम्बन्धलाई यी दुईले विवाहमा परिणत गर्न लागेका हुन्  ।

राजधानीमा हायात रिजेन्सी होटलमा उनीहरूको विवाह समारोह आयोजना गरिएको छ । विवाह समारोहमा दुवैतर्फका आफन्त एवं नजिकका साथीभाइको सहभागिता रहनेछ । 

वरिष्ठ चलचित्र निर्देशक नारायण पुरीका छोरा संयमले १० वर्षअघि प्रदर्शनमा आएको चलचित्र ‘शायद’बाट अभिनेताको रूपमा डेब्यू गरेका थिए । 

यद्यपि, त्यसअघि बालकलाकारका रूपमा समेत उनले थुप्रै चलचित्रमा अभिनय गरेका थिए । 

‘ग्याङस्टर ब्लुज’, ‘आभास’, ‘नाइँ नभन्नु ल ३’, ‘पुन्टे परेड’, ‘रातो घर’ जस्ता चलचित्रमा संयमले अभिनय गरेका छन् । 

यस्तै, गोपीकृष्ण हलका म्यानेजर प्रदीप दाहालकी छोरी आश्माले ‘आभाष’ र ‘नाइँ नभन्नु ल ३’, ‘रामप्यारी’ लगायतका चलचित्रमा अभिनय गरेकी छिन् । 

पछिल्लो समय अमेरिकामा बस्दै आएका संयम र आश्मा विवाहकै लागि गत साता नेपाल आएका थिए ।