गत असोजमा नेपाल, भारतसहित विश्वव्यापी रूपमा एकसाथ प्रदर्शनमा आएको नेपाली चलचित्र ‘प्रेमगीत ३’का निर्माता एवं निर्देशक सन्तोष सेनविरुद्ध परेको निवेदन नेपाल चलचित्र निर्माता संघले खारेज गरेको छ । सिक्किम निवासी राम गोपाल राईले चलचित्रको डिजिटल राइटस् खरिद गर्न दिएको रकम फिर्ता गराईदिन अनुरोधसहित निर्माता संघमा निवेदन दिएका थिए ।

आशुसेन फिल्मसका प्रमुख ‘प्रेमगीत ३’का निर्माता एवं निर्देशक सेनले चलचित्रको डिजिटल राइट्स भन्दै ४ करोड ८४ लाख ५० हजार रुपैयाँ ठगी गरेको सिक्किम निवासी राईको आरोप छ । 

शुक्रवार निर्माता संघका अध्यक्ष नवल खड्काको अध्यक्षतामा बसेको कार्यसमिति बैठकले राईले दिएको निवेदनमा छलफल गरिरहन आवश्यक नदेखिएको भन्दै निवेदन खारेज गर्ने निर्णय गरेको हो । संघले छलफलका लागि दुवै पक्षलाई बोलाएको बैठकमा निर्माता एवं निर्देशक सन्तोष सेन उपस्थित भए पनि राई भने उपस्थित भएका थिएनन् । उक्त छलफलपश्चात निर्माता संघले भनेको छ, ‘सन्तोष सेनविरुद्ध दिएको निवेदन पुष्टि हुने आधार नदेखिएको हुँदा छलफल गरिरहनु औचित्य देखिएन । त्यसैले निजको निवेदन खारेज गर्ने निर्णय गरियो ।’ 

छलफलमा निर्माता एवं निर्देशक सेनले आफूहरूबीच सम्झौता मिलिसकेको भए पनि निवेदकले चरित्रहत्या गर्न खोजेको बताउँदै कागजातसमेत पेश गरेका थिए । निर्माता संघका अध्यक्ष नवल खड्काले लोकान्तरसँग कुरा गर्दै भने, ‘यदि निवेदक वास्तवमै पीडित हुनुहुन्छ भने अदालत र प्रहरीकहाँ जान सक्नुहुन्छ, तर हामीले हेर्दा उहाँलाई पीडित पाएनौँ । त्यसैले हामीले निवेदन खारेज गरेका हौँ ।’