सत्ता गठबन्धनको प्रदेशस्तरीय संयन्त्रले कर्णालीमा गठबन्धन सफल भएको निष्कर्ष निकालेको छ । संयन्त्रको शुक्रवार बसेको बैठकले मंसिर ४ गते सम्पन्न प्रतिनिधि सभा र प्रदेश सभा निर्वाचनको समीक्षा गर्दै एकाध क्षेत्रबाहेक गठबन्धन सफल भएको निष्कर्ष निकालेको हो । कर्णालीमा सत्ता गठबन्धनले प्रतिनिधि सभातर्फ जुम्ला, प्रदेश सभामा सुर्खेत २ (१), दैलेख २ (२), जुम्ला १ र २, डोल्पा १ र मुगु १ क्षेत्र गुमाएका छन् । 

जुम्लाको प्रतिनिधि सभासहित प्रदेश सभाका पाँच सिटमा आन्तरिक कमजोरीका कारण प्रतिकूल परिणाम आएको बैठपछि जारी विज्ञप्तिमा उल्लेख गरिएको छ । बैठकले निर्वाचित उम्मेदवारलाई बधाइ तथा मतदातालाई धन्यवाद दिँदै कर्णालीको विकास र समृद्धिका लागि साझा नीति तथा कार्यक्रमसहित एकताबद्ध भएर अघि बढ्ने प्रतिबद्धता जनाएको छ । 

माओवादी केन्द्रका कर्णाली प्रदेश अध्यक्ष विमला केसीले प्रदेश सरकार गठनका विषयमा केन्द्रको निर्णय पर्खिने बताइन् । प्रदेश सरकारको नेतृत्वका कांग्रेस र माओवादी केन्द्रले दाबी गर्दै आएका छन् ।