चीनका राष्ट्रपति सी चिनपिङले यसै साता साउदी अरबको भ्रमण गर्ने भएका छन् । 

सीले साउदी राजा सलमान बिन अब्दुलअजीज अल–साउद र युवराज मोहम्मद बिन सलमानसँग भेटघाट गर्नेछन् । अनि उनले अरब तथा खाडीका नेताहरूसँग दुईवटा शिखर सम्मेलनमा पनि भाग लिनेछन् । 

दुवै पक्षले यस भ्रमणको विस्तृत विवरण दिएका छैनन् । तर चीन र साउदीबीच खुला व्यापारदेखि आणविक शक्तिसम्मका विषयमा सहकार्यका लागि सम्झौता हुन सक्ने बताइएको छ । 

गत जुलाई महिनामा अमेरिकाका राष्ट्रपति जो बाइडनले साउदी अरब भ्रमण गर्दा अमेरिका पश्चिम एसियाबाट कतै नजाने बताएका थिए । चीन, रुस वा इरानले अमेरिकाको अनुपस्थितिबाट उत्पन्न शून्यतालाई भर्न नसक्ने किनकि अमेरिका कतै नजाने उनको भनाइ थियो । 

तर बाइडन र बिन सलमानबीच चिसो सम्बन्ध रहिआएको छ । 

यस्तो अवस्थामा चीनले साउदीहरूलाई आफूतिर आकर्षण गरेमा वाशिङटन र बेइजिङबीचको रणनीतिक लडाइँमा बेइजिङ विजयी हुनेछ । 

साउदी अरब र संयुक्त अरब अमिरात सैन्य उपकरण तथा सुरक्षाका लागि अमेरिकामा भर पर्ने गरेका छन् । चीनले अमेरिकाको जस्तो हतियार अरबीहरूलाई दिन सक्दैन । 

तैपनि साउदी अरब र अन्य खाडी मुलुकहरू व्यापार, प्रविधि र ब्यालिस्टिक क्षेप्यास्त्र तथा सशस्त्र ड्रोनको मामिलामा बेइजिङसँग सहकार्य गर्न चाहन्छन् ।