अमेरिकी सेनाले अस्ट्रेलियामा आफ्नो उपस्थिति विस्तार गर्न तयारी पूरा गरेको छ । 

अमेरिकाका रक्षामन्त्री लोयड अस्टिनले अस्ट्रेलियामा थप सैनिक तथा वाहनहरू तैनाथ गर्ने बताएका छन् । उक्त क्षेत्रको शान्ति तथा स्थिरतामा चीनले बाधा गरेको आरोप पनि उनले लगाएका छन् । 

अस्ट्रेलिया भ्रमणमा रहेका अस्टिनले आफ्ना समकक्षीसँग मंगलवार भएको भेटघाटपछि जारी गरेको विज्ञप्तिमा थप अमेरिकी सैनिक अस्ट्रेलियामा तैनाथ गर्ने जानकारी दिएका हुन् । चीनको प्रतिकार गर्नका लागि अमेरिकाले स्थल, जल र वायुसेनालाई थप बढाउने विज्ञप्तिमा उल्लेख छ । 

अस्टिनले नयाँ तैनाथीका बारेमा विस्तृत विवरण उपलब्ध गराएनन् तर पेन्टागनले अस्ट्रेलियामा थप उपस्थिति बढाउन नयाँ स्थानहरूमा पनि सैन्य अड्डा बनाउने बताए । उनले अमेरिकी लडाकू तथा बमवर्षक विमानहरू तयारी अवस्थामा राखिने जानकारी पनि दिए । 

अमेरिकाले अस्ट्रेलियाको उत्तरी भागमा आणविक बम समेत बोक्न सक्ने ६ वटा बी–५२ बमवर्षक विमान पठाउन खोजिरहेको छ ।