श्रम अदालतले मकरीगाड हाइड्रोपावर प्रालिमा कार्यरत प्रमुख कार्यकारी अधिकृत पूजा चन्द ठाकुरलाई पुनःबहाली गर्ने फैसला गरेको छ ।

अदालतका अध्यक्ष वासुदेव आचार्य र सदस्य  प्रेमकुमार राईको संयुक्त इजलाशले मंसिर १४ गते पुनःबहाली गर्ने फैसला गरेको हो ।
    
हाइड्रोपावरले बर्खास्त गरेपछि पुनःबहालीको माग गरी श्रम अदालतमा चलेको मुद्दामा ४ वर्षपछि ठाकुरलाई सेवाबाट हटाएको मितिदेखि पारिश्रमिक तथा सम्पूर्ण सेवा सुविधासहित पुनःबहाली गर्न भनिएको छ ।  
 
विक्रम संवत् २०७५ मंसिर ७ गते ठाकुरलाई  हटाउने निर्णय गरिएको थियो । उक्त निर्णय बदर गर्न माग गर्दै ठाकुरले जिल्ला अदालत काठमाडौं, श्रम तथा रोजगार कार्यालय काठमाडौं तथा श्रम अदालत लगायतका निकायमा लामो समयदेखि मुद्दा खेप्दै आएका थिए ।
     
व्यवस्थापन पक्षले पदमा समेत सम्झौता नगरी काममा लगाएको र सेवाबाट हटाउँदा सूचना नदिई हटाएकाले व्यवस्थापनको निर्णय गैरकानूनी भएको हुँदा निर्णय बदर भएको जनाइएको छ ।

अदालतको फैसला बमोजिम ठाकुरको सेवामा पुनःबहाली नभएसम्मको पारिश्रमिक, सेवा, सुविधा समेत गरी करीब १ करोड दिन र सेवामा पुनःबहाली गर्न आदेश भएको छ । श्रम ऐन २०७४ को कानूनी व्यवस्था विपरीत सेवाबाट हटाएको अवस्थामा ऐनको दफा १७२(१) बमोजिम सेवामा पुनःबहाली भई सेवा सुविधा पाउने कानुनी व्यवस्था रहेको छ ।