रुकुमपूर्व भूमे गाउँपालिका–४ काँडाका मनशोभा बुढा ९५ वर्ष पुगिन् । बुढेसकालले छोएसँगै उनले विगत २ वर्षयता आँखाको ज्योति गुमाएकी थिइन् ।

परिवारका अन्य सदस्यको साहारा लिएर घरभित्र र बाहिर गर्दै आएका बुढाले रुकुमकोटमा आँखाको उपचार गरेपछि विगतको जस्तै देख्न थालेकी छन् ।

भूमे–३ का ७७ वर्षीय गोकुल विकले पनि आँखाको उपचारपछि राम्रोसित देख्न थालेका छन् । आँखाको शल्यक्रियापछि उनी दंग छन् । रुकुमपूर्वमा मंसिर १८, १९ र २० गते स्वास्थ्य शिविर आयोजना गरिएको थियो । शिविरमा १०१ जनाको आँखाको शल्यक्रिया गरिएको थियो ।

सिस्ने गाउँपालिका–५ स्थित रुक्मिणी माविमा १–१ पाइला फाउन्डेशन र गोपाल शाहको परिवारले सिस्ने गाउँपालिका, राप्ती आँखा अस्पताल रक्षाचौर दाङ लगायत अन्य निकायसँगको सहकार्यमा आयोजना गरेको शिविरबाट धेरै लाभान्वित भएका छन् ।

रुकुम पूर्वमै आँखाको शल्यक्रिया गर्ने सुविधा नहुँदा र पछिल्लो समयमा जिल्लामा आँखा शिविर सञ्चालन नगर्दा एउटै शिविरबाट धेरैले लाभ लिएका छन् । 

घरआँगनमै १ रुपैयाँ खर्च नगरी आँखाको शल्यक्रिया गर्न पाउँदा खुशी लागेको भूमे–५ का पृथीबहादुर कामीले बताए । उनी भन्छन्, ‘म अहिले ७६ वर्षको भएँ, ४० वर्षको उमेर हुँदा आँखाको ज्योति गुमेको थियो । आर्थिक अवस्था कमजोर भएकाले अन्यत्र गएर उपचार गर्न सकिन, अहिले देख्न सक्ने भएँ ।’

सिस्ने गाउँपालिका–५ का गनेश शाहले शिविरबाट धेरैजना लाभान्वित भएका बताए । ‘जिल्लामै भरपर्दो स्वास्थ्य सेवा पाउन समस्या छ, भरपर्दो सेवाका लागि दाङ, नेपालगञ्ज, काठमाडौं लगायत ठाउँ धाउनुपर्ने बाध्यता छ,’ उनले भने ।