तानसेन–तम्घास सडक दैनिक १० घण्टा बन्द हुनेभएको छ । तानसेन तम्घास सडकखण्डको रिब्दीकोट क्षेत्रमा सडक कटिङ् तथा नाली निर्माण गर्न सडक बन्द गरिएको हो । 

रिब्दीकोटको विभिन्न क्षेत्रमा सडक निर्माणका लागि सडक बन्द गर्न व्यवसायीबाट अनुरोध भएअनुसार सडक बन्द गरेर निर्माणको काम अघि बढाइ्रएको सडक डिभिजन कार्यालय पाल्पाले जनाएको छ । कार्यालयका इन्जिनियर निरन्जन शर्माका अनुसार सडक निर्माणका लागि मङ्सिर २२ गतेदेखि पुस ७ गतेसम्म १५ दिन सडक बन्द हुनेछ । 

डिभिजन कार्यालयका अनुसार हरेक दिन बिहान ५ बजेदेखि ९ बजेसम्म, दिउँसो १२ बजेदेखि ३ बजेसम्म र बेलुकी ६ बजेदेखि ९ बजेसम्म सडक बन्द रहने छ । सडक डिभिजन कार्यालयले पटक–पटक सडक निर्माणको नाममा सडक बन्द गरेर सास्ती दिएको यात्रुहरुको गुनासो छ । 

निर्माण व्यवसायीले विकल्पसहित काम गर्नुपर्ने स्थानीयको सुझाव छ । विना विकल्प दिएर यात्रुलाई दुःख दिनु गलत भएको तानसेन–१४ अर्गलीका कमल पाण्डेयले गुनासो गरे । डिभिजन कार्यालयको काममा ढिलासुस्ती हुँदा लामो समय स्थानीयले दुःख पाएको उनले बताए ।