जापान, बेलायत र इटलीले नयाँ पुस्ताको लडाकू विमान कार्यक्रमलाई एकअर्कासँग मिलाउने घोषणा गरेका छन् । 

युरोप र एसियाबीचको यो पहिलो ठूलो रक्षा सम्झौता हो । 

दोस्रो विश्वयुद्धपछि पहिलोपटक जापानको कुनै हतियार कार्यक्रममा अमेरिका समावेश छैन । चीन र रुसले तेर्स्याएको जोखिमका बीच अमेरिकाले जापानलाई  सुरक्षा प्रत्याभूति दिइरहेको भए पनि हतियार विकास कार्यक्रममा जापानले अमेरिकालाई अलग्याएको हो । 

तीन देशको सम्झौताअनुसार सन् २०३५ सम्ममा लडाकू विमान तयार हुनेछ । त्यसमा बेलायतको नेतृत्वमा रहेको फ्युचर कम्ब्याट एयर सिस्टम प्रोजेक्ट समावेश गरिनेछ । अनि जापानको एफ–एक्स प्रोग्राम पनि यसमा अटाउनेछ । 

तीनै देशले शुक्रवार एक बयान जारी गरी सम्झौताको घोषणा गरेका हुन् । 

विज्ञहरूका अनुसार, यस सम्झौताबाट जापानले चीनको जोखिमलाई पन्छाउन सक्छ । अनि उक्त क्षेत्रको सुरक्षामा बेलायतको भूमिका पनि बढ्नेछ । 

तीनै देशले बयान जारी गरेर बताए, ‘कानूनमा आधारित, स्वतन्त्र र खुला अन्तर्राष्ट्रिय व्यवस्था कायम राख्न हामी प्रतिबद्ध छौं । यी सिद्धान्तहरूमा अहिले चुनौती थपिएको छ । जोखिम र आक्रामकता बढिरहेको छ, त्यसैले हामीले सम्झौता गरेका हौं ।’

यस सम्झौतामार्फत जापानले आफ्नो साथी तथा सहयोगी अमेरिकालाई ठूलो सन्देश दिएको छ । जापानले पहिला अमेरिकाको लकहीड मार्टिन हतियार कम्पनीलाई छानेको भए पनि अहिले उसले बेलायत र इटलीसँग हात मिलाएको छ । 

तर सन् २०३५ सम्म चीनको पाँचौं पुस्ताको लडाकू विमानलाई टक्कर दिने अत्याधुनिक फाइटर जेट बनाउन निकै गाह्रो रहेको विज्ञहरू बताउँछन् ।