नेकपा एमालेले परिवार दलका अध्यक्ष एकनाथ ढकाललाई समानुपातिकतर्फबाट सांसद बनाउने निर्णय गरेपछि एमाले नेता भीम रावलले प्रश्न उठाएका छन् । आइतवार ट्वीट गर्दै रावलले भनेका छन्, ‘जापान सरकारको समेत छानबिनमा परेको होली वाइनको झोली भर्ने तरिका ।’

ढकालले अमेरिकामा कर छलीको आरोपमा २ वर्ष र कोरियामा जासुसीको आरोपमा ३ वर्ष कारावासको सजाय भोगेको रावलले उल्लेख गरेका छन् । युनिफिकेशन चर्चसँग जोडेर पनि ढकालको चर्चा हुने गरेको छ । 

‘सन मुंग मुनद्वारास्थापित विवादास्पद युनिफिकेशन चर्चसँग आवद्ध होली वाइन भनी चर्चित नेपाल परिवार दलका अध्यक्ष एकनाथ ढकाललाई नेकपा एमालेले प्रतिनिधि सभा सदस्य बनाएको छ । परिवार दलले ढकालको हस्ताक्षरबाट चुनावमा उम्मेदवार पनि उठाएको छ’, रावलले उल्लेख गरेका छन् । 

‘एकसाथ एउटा दलको अध्यक्ष र अर्को दलको समानुपातिक प्रणालीबाट प्रतिनिधि सभाको सदस्य, क्या चमत्कार ! राजनीतिमा नैतिकताको खडेरी’, उनले लेखेका छन्, ‘स्मरणीय छ, ढकालको विवाह पनि विदेशी महिलासँग भएको थियो ।’