नेकपा एमालेका सांसद तथा पूर्वपर्यटनमन्त्री योगेशकुमार भट्टराईले निजगढ अन्तर्राष्ट्रिय विमानस्थल निर्माणमा राज्यकै निकायहरूले अवरोध गरेको बताएका छन् । शुक्रवार काठमाडौंमा नेपाल नागरिक उड्डयन प्राधिकरणले आयोजना गरेको ‘एभिएशन मिट २०२२’ कार्यक्रममा बोल्दै उनले निजगढ अन्तर्राष्ट्रिय विमानस्थल निर्माणमा राज्यकै निकायहरूले अवरोध गरेको बताए । 

पूर्वमन्त्री भट्टराईले राज्यकै निकायले निजगढजस्तो विमानस्थल आयोजनालाई रोक्नु दुःखद रहेको बताए । उनले राज्यका कतिपय निकायहरूले विमानस्थलको विषयमा बुझ्न नसकेको बताए । उनले वातावरणसम्बन्धी चासो भएको निकायले अर्कोको क्षेत्रमा हस्तक्षेप गरिरहेको आरोप लगाए । 

सांसद भट्टराईले निजगढ विमानस्थल रोक्नु नेपाललाई अगाडि जान नदिनु भएको पनि बताए । उनले  राज्य संयन्त्रले जसले जे काम गर्नुपर्ने त्यो काम नगरेको भन्दै न्यायको निरुपण गर्नेले ढिलो गरिरहेको उल्लेख गरे । 

त्यस्तै, पूर्वपर्यटनमन्त्री जितेन्द्रनारायण देवले हवाई यात्रुहरूलाई बाहिर राखेर हवाई नीति बनाउन नहुने बताए । उनले त्यस्तो नीति बनाएर कार्यान्वयनमा लगियो भने नेपालको हवाई उडान क्षेत्र समस्यामा पर्नसक्ने बताए । उनले सरकारले नेपालको हवाई उडान क्षेत्रलाई नीतिगत रूपमा अगाडि बढाउँदा आन्तरिक र अन्तर्राष्ट्रिय उडानमा आकर्षण गर्न सक्नुपर्ने बताए । उनले सरकाले त्यसतर्फ ध्यान दिएमा मात्रै नागरिक उड्डयनले सामाजिक तथा आर्थिक विकासमा योगदान गर्नसक्ने बताए ।