प्रदेश १ का नव नियुक्त मुख्यमन्त्री हिक्मतबहादुर कार्की चौथो मुख्यमन्त्रीमा नियुक्त भएका छन । पहिलो कार्यकालमा आन्तरिक मामिला तथा कानून मन्त्री भएका कार्की पूर्व कानून व्यावसायी समेत हुन् । 

२०३६ सालमा अनेरास्ववियुमा आवद्ध भएका कार्की २०५३ सालमा नेपाल ल क्याम्पसमा स्ववियु सभापति भए । २०५५ सालमा अखिल नेपाल राष्ट्रिय स्वतन्त्र युनियन (अनेरास्वियु)केन्द्रीय अध्यक्ष भएका थिए । हिक्मत २०७१ मा एमालेको केन्द्रीय कमिटी सदस्य, २०७१ देखि २०७३ सम्म मेची अञ्चल इञ्चार्ज र २०७८ मा एमाले कमिटी सदस्य भए । 

अनेरास्वियुको अध्यक्षको कार्यकाल सकिएपछि कार्कीसहित ३ जना मिलेर २०५८ सालमा काठमाडौँमा ल फर्म खोलेका थिए । तर उनले फर्ममा लामो समय काम गरेनन् । परिवार नै राजनीतिमा सक्रिय रहेकोले उनी राजनीतिबाट अलग्गिन सकेनन् । 

‘परिवारका सबै सदस्य राजनीतिमा थियौं’ हिक्मत कार्कीका दाजु तथा नेकपा एमाले झापाका अध्यक्ष दीपक कार्कीले भने, ‘पछि परिवार पाल्न नै पो समस्या हुन्छ कि भनेर कानूनको विद्यार्थी भएकाले पनि ल फर्म खोल्न भनेका थियौं ।’ 

दीपक २०६४ र ०७४ को निर्वाचनमा तत्कालीन झापा ६ बाट निर्वाचित भएका थिए । २०६४ मा झापामा एमाले अध्यक्ष केपी शर्मा ओलीले चुनाव हार्दा हिक्मतका दाजु दीपकले भने चुनाव जितेका थिए । 

दाजु दीपक र दिदी राधा कार्की पनि राजनीति गर्थे । ‘मेरो इन्स्पेक्टर बन्ने इच्छा थियो ।  भाइलाई कानून पढ्न लगायौ । उसले पनि राजनीति सुरु गर्‍यो । आफूले राजनीति गर्ने भएकाले उसलाई पनि राजनीति नगर भन्न सक्ने अवस्था थिएन । त्यहीँ कानुन व्यवसायी बनोस् भन्ने लागेको थियो । तर हामी दुवै जनाले राजनीति गर्‍यौं । बहिनी राधाले भने पछि शिक्षकको जागिर खाइन्’ दाजु दीपकले भने ।  

जागिर खान भने परिवारले दबाब नदिएको उनले बताए । दुई पटक गाविस अध्यक्ष हुँदै दुई पटक सांसद भएपछि भने भाइ हिक्मतलाई पनि राजनीति गर्न सजिलो भएको उनले बताए । कार्की एमालेमा ओली निकटका नेता हुन् ।

उनले नेपाल ल क्याम्पसबाट एलएलएमसम्मको अध्ययन गरेका छन् ।