केन्द्रमा शीर्ष नेताहरूले गरेको सहमति लुम्बिनी प्रदेशमा उल्टिएको छ ।

लुम्बिनीमा पाँच वर्ष एमालेले नेतृत्व गर्ने सहमति भए पनि आधा कार्यकाल माओवादी पाउने दलहरूबीच पुनः सहमति भएको छ ।

मुख्यमन्त्रीका दाबेदार माओवादी केन्द्र संसदीय दलका नेता जोखबहादुर महराले आलोपालो हुनुपर्ने भन्दै पार्टी नेतृत्वसमक्ष अडान राखेपछि आधा/आधा कार्यकाल सरकारको नेतृत्व गर्ने सहमति भएको हो । पहिलो चरणमा एमालेका लीला गिरी मुख्यमन्त्री बन्नेछन् ।

माओवादी केन्द्र लुम्बिनी प्रदेश अध्यक्ष सुदर्शन बरालले आलोपालो सरकारको नेतृत्व गर्न दुवै दलका शीर्ष नेताबीच सहमति भएको बताए । स्रोतका अनुसार एमालेका गिरीले पहिलो साढे २ वर्ष र महराले पछिल्लो साढे २ वर्ष सरकारको नेतृत्व गर्ने सहमति भएको छ ।

यसअघि लुम्बिनी, गण्डकी र प्रदेश १ सरकारको नेतृत्व ५ वर्ष नै एमालेले गर्ने केन्द्रमा सहमति भएको थियो । 

एमाले संसदीय दलका नेता गिरीले मंगलबार मुख्यमन्त्रीमा दाबी पेश गर्ने तयारी भए पनि प्रधानमन्त्री पुष्पकमल दाहाल र एमाले अध्यक्ष केपी ओलीलाई भेट्न महरा काठमाडौं पुगेपछि मुख्यमन्त्रीको दाबी पेश गर्ने कार्यक्रम भोलिका लागि सारिएको छ ।