नेपालका लागि खेल सामाग्री उत्पादक संस्था योनेक्सको आधिकारिक बिक्रेता इनास इन्टरप्राइजेजको सहयोग र अपि स्पोर्टस् म्यानेजमेन्टको आयोजनामा आजबाट इनास अपि स्पोर्ट्स जुनियर ब्याडमिन्ट च्याम्पियनसिप शुरू भएको छ। 

योनेक्स सनराइज इनासको मुख्य प्रायोजन रहेको च्याम्पियनसिपमा यू-१५, यू-१३ र यू-११ छात्र तथा छात्रा गरि ६ विधामा प्रतिस्पर्धा भइरहेको इनासका प्रोपाइटर राजु बास्तोलाले जानकारी गराए । 

लामो समयदेखि ब्याडमिन्टन प्रतियोगितामा योनेक्स सनराइजमार्फत प्रायोजन तथा खेलाडीहरूलाई सहयोग पुर्‍याउँदै आएको इनासले ब्याडमिन्टन खेलाडी उत्पादन गर्ने उद्देश्यले अन्तर्राष्ट्रियस्तरमा आयोजना हुने जुनियर प्रतियोगितालाई महत्वमा राख्दै च्याम्पियनसिप आयोजना गरेको जानकारी गराए ।

प्रतियोगिता आज पुस २८ देखि ३० गते सम्म बशुन्धारास्थित जेष्ट ब्याडमिन्टन एकेडेमीको कभर्ड हलमा आयोजना भईरहेको छ। 

च्याम्पियनसिपमा करिब १५० खेलाडीको सहभागिता रहेको छ । 

प्रतियोगिताको उद्घाटन ओलम्पिक कमिटीका सह-सचिव पीताम्बर तिमल्सिनाले गरे। 

'आयोजक संस्थाले जुनियर भाइ बहिनीहरूलाई इन्करेज गराउने उद्देश्यले यो प्रतियोगिताको आयोजना गरेकोमा आयोजकलाई धेरै धन्यवाद छ,' उनले हौसला दिँदै भने, 'यी जुनियर भाइ बहिनीहरूले भोलिका दिनमा दक्षिण एसिया र अन्तर्राष्ट्रिय स्तरमा नेपालको झन्डा उचाल्नेमा म आशावादी छु।'

त्यस्तै उद्‍घाटनकै क्रममा नेपाल ब्याडमिन्टन संघका अध्यक्ष रामजीबहादुर श्रेष्ठले भने, 'यस्तो खालको प्रतियोगिता नेपालको इतिहासमै पहिलो पटक आयोजना भएको छ, यसले खेलाडी उत्पादनमा थप टेवा पुर्‍याउनेमा म विश्वस्त छु, आयोजकलाई धेरै धन्यवाद।' 

त्यस्तै आयोजक तथा इनास इन्टरप्राइजेजका प्रोपाइटर राजु बास्तोलाले बच्चाहरूलाई प्रोमोट तथा देशमा खेलाडी उत्पादन गर्नु नै आफूहरूको प्रमुख उद्देश्य भएको बताए। 

'हामीले प्रत्येक वर्ष यो खेलको आयोजना गर्ने निर्णय पनि गरिसकेका छौँ। तर मेरो व्यक्तिगत इच्छा भनेको वर्षमा तीन पटकसम्म जुनियर लेभलको प्रतियोगिता गर्नु हो,' उनले भने, 'अब लगत्तै सात वर्ष उमेर समूहदेखि नै जुनियर प्रतियोगिता गर्ने लक्ष्य मैले राखेको छु।'

यहाँ कलाकार ‘सीते बा’ मधुसुधन पाठकको पनि उपस्थिति रहेको थियो। 

बाँकी भिडियोमा हेर्नुहोस् :–